Hewildan bo pêkhênanî berey hawbeş

Sazmanî Înqîlabî u Kurdistan (82)


Mêhdî Xanbaba Têhranî û dozî Kurdistan


Beşêk le giftugoy Hemîd Şewket legell mêhdî Xanbaba Têhranî


Awrêk le bizûtnewewî çep le Iran le nawewe, giftugo legel Mêhdî Xanbaba Têhranî, çapî yekem beharî 1989



Şewket: Wate le serderaney pêkhatinî kongirey Şûray Gelan le Mehabad.
Xanbaba Têhranî: Le giftugokanî pêşû da amajem bewe kirduwe. Xumeynî le rewtî helbijardinekanî meclîsî damezrêneran da biryarî da nawî meclîseke be meclîsî "Xîbrekan" bigorê û tenya ew kesane wek nwêner helbijêrdirên ke ehlî "zansit" wate le rohanîyekan bin. Lew serubendî da Cebhey Dêmokratîkî Neteweyî biryarî da be yarmetî Kurdekan û hêze opozîsyonekanî dîke, le hember Meclîsî Xîbrekanî Xumeynî da, wekû protêst meclîsêkî damezrêneranî sembolîk, ke le layen nwêneranî cor becorî hîzbekan û grûpekanewe pesind kira bê, dijayetî xoy legel Meclîsî Xîbrekan û helbijardnekanî rabigeyênê. Rojêk ber lew danîştine pelamarî sertaserî rêjîm bo ser Kurdistan kira. Duway ew rûdawane Cebhey Dêmokrratîk biryarî da bo pêkhênanî bereyekî yekgirtûy berfirewan be beşdarî Kurdekan, Mucahîdîn û hêze opozîsyonekanî dîke bo rûberû bûnewe legel rêjîm. Helbet Mucahîdîn hêşta be şêwey narastewxo lew pêwendîye da bûn. Û biryar dira ke hewelîn hengaw bo şikil dan bew bereye helbijardinî serokayetî komar bê. Ew demî rêkxirawî ême, 'îtîhadî çep'  gelaleyekî be nawî "pêwîstî pêkhênanî bereyekî taqaney dêmokratîk – dijî empiryalîstî û pêkhênanî berey taqaney çep" amade kird. Nexşey ême ewe bû ke çepîyekan be cwê bereyekî taqane pêk bênin û duwatir legel hêzekanî dîke le bereyekî herawî dêmokrratîk da hawkarî biken. Ême bo giftugo le ser ew gelaleye û hênane goî pêşniyarî berey dêmokratîk çûyne Kurdistan. Lewê yekem dîdarman legel berpirsanî Komele bû. Ewan be şêweyekî giştî legel gelalekey ême da bûn. Duwaye dîdarman kird le Şêx 'Êzedîn ewîş pêşwazî kird lew gelaleye.  Rojî duwatirîş çûyne soraxî defterî siyasî Hîzbî Dêmokratî Kurdistan û mîwanî ewan bûyn. Ewanîş pêşwazîyan kird le pêkhatinî bereyekî ewto û helsengandinyan ewe bû ke wez'îyetî wulat nîşan deda rûhanîyet temay girtûwe deselatî siyasî bikate qorxî xoy û deyewê rewtî wulat yeklaye bika.  


Şewket: Le Hîzbî Dêmokrat da hêndêk rewt hebû ke be pêroyî le rêbazî hîzbî Tûde her core dijayetîyekî legel rêjîm be nadurust denirxand. Leser ew bale delêy çî?
Xanbaba Têhranî: Bizûtnewey Kurdistan lew zemanî da metirsîyekî gewrey le kol xoy kirdewe. Hîzbî Tûdey pêroy rêbazî hawkarî û piştîwanî le Xumeynî hewlî da ta bizûtnewey Kurdistan be şêwey reha û be tewawî bikate gwêrayelî ew bîrokeye û bew rêyey da berê. Hîzbî Tûde pêy wa bû ke le ser binemay  nerîtî rabridû, leber ewey bizûtnewey Kurdistan coreyek xizmayetî legel ewan hebûwe, êstaş debê piştîwanî le rêbazî hîzbî Tûde bka.  Helbet le rîzekanî Hîzbî Dêmokratî Kurdistan da kesanêkî zor hebûn ke nek her bîruray hîzbî Tûdeyan hebû, belkû beşêk lewan endamîşî bûn. Kesanî wek Kerîm Hîsamî, Xenî Bulûryan û be kurtî ew taqimî 7 kesîyey ke le Hîzbî Dêmokrrat û rêberayetîyekey wela niran [rast e, nemir Kerîm Hîsamî le astî nêwneteweyî da layengirî rêbazî sovîyet bû, belam katî cwêbûnewey taqimî 7 kesî yan durusttir pêrewanî kongrey çuwarem, legel ew kirdeweyey ewan nebû, belkû be salan duwatir le Hîzbî Dêmokrratî Kurdistanî Iran der kira, H.Q.]. Le rastîda le layen hîzbî Tûdewe kudetayek be dijî Hîzbî Dêmokratî Kurdistan rêk xira bû, le ber ewey ke katêk hîzbî Tûde hestî pê kird natuwanê Hîzbî Dêmokrat bikate gwêrayelî xoy û be dûy xoyda ray bikêşê be tema bû le hember wîda Hîzbî Dêmokratêkî dîke weseryek xa. Helbet be derkiranî taqimî 7 kesî le rêberayetî Hîzbî Dêmokrat, hêşta zemîney bîruray Tûdeyî le naw neçûwe û parastinî silametî û le cêda pak û xawênî rêbazî Hîzbî Dêmokrat bestrabûwewe be pêwendîyekî berbilaw le astî hemû wulat da.

Şewket: Zemîney nizîkî Hîzbî Dêmokrat û beşdarî le bereyek ke le hellbijardinî serokayetî komar da piştîwanî le Recewî dekird çilon xoş kira?
Xanbaba Têhranî: Be pêy gelaley berey dêmokrratîkî neteweyî bo damezrandinî bereyekî hawbeş le hêzekanî opozîsyon û seferî ême bo Kurdistan û giftugoman legel rêberanî bizûtnewey kurd, Hîzbî Dêmokrat pêşwazî kird lew gelaleye. Akamî ew sefere û pêwendî girtinman legel Mucahîdîn û Kurdekan bû be ewe ke Mucahîdîn hevpeyvînêkyan legel Qasimlû bilaw kirdewe u narastewxo le rêgay êmewe û berey dêmokrratîk we dûy pêwşiwênî babetî pêkhênanî berey heraw kewtin. Ke katî helbijardinî serokayetî komar geyiştê, Kurdekanîş piştîwanîyan kird le berendametî  Recewî be nardinî nwênerî xoyan, Sarim xanî Sadiqwezîrî bo naw Şûrray Koordînasyonî Helbijardinî Serokkomarî. Le gelalekirdnî bernamey 14 madeyî helbijardinî Recewî da beşdarî çalakaneyan hebû. Bew pêye be peywest bûnî Hîzbî Dêmokrat û Komele û Şêx 'Êzedîn Husênî lew cûlaneweye û piştîwanî le berendametî Recewî gişt bizûtnewey Kurdistan yek parçe hate naw ew bereye.



Dirêjey heye….