Gengeşey naw şuray Mîlî Muqawemet

Hesen QAZÎ nivîsand —

Yekşem 8 Tebax 2021 - 09:57

Sazmanî Înqîlabî u Kurdistan (89)

Mêhdî Xanbaba Têhranî û dozî Kurdistan
Beşêk le giftugoy Hemîd Şewket legel Mêhdî Xanbaba Têhranî
Awrêk le bizûtnewewî çep le Iran le nawewe, giftugo legel Mêhdî Xanbaba Têhranî, çapî yekem beharî 1989

Şewket: Le naw şûray Mîlî Muqawemet da dijayetî legel Benî Sedir ziyatir le hemwan le layen kam le rewtekanewe dekra?
Xanbaba Têhranî: Dijayetî legel Benî Sedir be radey ciyawaz le nawewe û le derewey şûrawe degeşawe. Be taybetî sebaret be rageyandinî serok komarêtî wî ke pêşawpêş le layen Mucahîdînewe diyarîy kirabû 'êtraz û rexney tund hebû. Bo wêne nwêneranî dewreyî Hîzbî Dêmokratî Kurdistan le şûra da be amadebûnî Benî Sedir le şûra da wek serokkomar dijayetîyan dekird, le katêkda Qasimlû be şexsî xoy le dûy amadebûnî wî deda. Katêk ke xîlaf û kêşey Mucahîdîn legel Benî Sedir gewre buwewe, Qasimlû be zanînî ew kêşeye û mebestî Mucahîdîn le nameyek da le layen Hîzbî Dêmokratewe pêşniyarî kird  ta nardinî heyetî nwênerayetî Hîzbî Dêmokrat bo Parîs danîşitinî lêkolînewey xîlaf legel Benî Sedir webixrê, belam Mucahîdîn ber lewey nwênerî Hîzbî Dêmokrat bigatê kobûnewekeyan kird. Le heman katda ew kesaney ke le layen defterî hîzb [le parîs, amadekar] le danîştneke da amade bûn, be bê leber çawgirtinî helumerc û hestyarî pêwîst sebaret be meseleke, be na puxtebûnî siyasî rewtî cwêbûnewey Benî Sedr û şûrayan xêratir kird. Duwatir Qasimlû be minî gut ke helwêstî nwêneranî Hîzbî Dêmokrat û endamekanî dîkey şûra le ser meseley Benî Sedr û Mucahîdîn hele buwe û debû be şîweyekî dî helsukewit bikrê ke negate cwêbûnewey Benî Sedr le şûra. 

Şewket: Maweyek le duway derkewtinî Benî Sedr le şûra kêşe le nêwan Mucahîdîn û Hîzbî Dêmokrat da qûl buwewe. Ew kêşeye goya le ser ew î'trazey Mucahîdîn bû le muzakereyek ke Hîzbî Dêmokrratî Kurdistan, be bê agadarî şûra legel rêjîmî Xumeynî kird bûy û le çapemenî da hera û huryay lê saz bibû. Lew bareyewe delêy çî?
Xanbaba Têhranî: Ew babete îdî lemer tewaw bûnî karî şûra bû. Ewan rojan Hîzbî Dêmokrat pêşniyarêkî kird bû lemer gewre kirdinewe û pere pêdanî şûra, babetî wergirtinî îstgey radyoyî le 'Iraqîş le gorê da bû û biryar bû ew dû babete bikewne rojevî danîştinî şûra. Be pêk hatnî kobûneweke, Mucahîdîn babetî gewre kirdnewey şûra û radyoyan le rojevî kobûnewe derxist û meseley dîdarî  destey nwênerayetî Hîzbî Dêmokratî Kurdistanyan legel cimhûrî îslamî hêna pêşê û rayangeyand şûra debê lew bareyewe bas û gengeşe bika û helwêst bigrê. Mucahîdîn deyangut tenya rêgay rûxandinî rêjîmî Xumeynî rêgay be zebruzenge . Ca eger wa bê çon dekrê ke Hîzbî Dêmokrat wekû endamî şûra legel rêjîmî Xumeynî muzakere bika? Argumêntî Hîzbî Dêmokratî Kurdistan le kobûneweyek da ke Qasimlûş têyda amade bû ewe bû ke ewan sitratêjî serewnixûn kirdnewey be zebruzeng depejrênin, belam muzakere berperç nadenewe çunke muzakere dirêjey siyasete û le zorêk le şere azadîderekan da, wek şerî vîyetnam, legel neberd le hember Emrîka muzakereş kirawe. Eger Sazmanî Mucahîdîn  legel şêweyekî ewto dijayetî bika be manay têgeyiştinî kemukurt le siyaset û xirkirdnewe û welananêtî. Cige lewe ewan pêşniyarî muzakere le layen dewletî Iranewe be Hîzbî Dêmokratyan be şûra rageyanduwe. Qasimlû deygut: " bizûtnewey Kurdistan mawey 5 sale legel rêjîmî Xumeynî le doxî şer daye û hêzêkî away ke le şerewe gilawe nakrê be belên û biryey serxerman dilî bidrêtewe. Pêşmergekanî ême kewşyan depê da nîye û qend û çay rojaneyan nîye. Êwe lew maweye da çi yarmetîyektan kirduwe be bizûtneweyekî ke le doxî şer daye ke emro detanewê tenanet mafî muzakerey siyasîşî lê bistênnewe û bew şêweye qeyûmayetî xotanî be ser da binwênin? Ême mafêkî awa nadeyne dest hîç keş û ew mafe be şûrraş nadeyn. Her ew corey ke mafî muzakere bo rêkxirawî êwe heye û legel 'Iraq muzakeretan kirduwe, êmeş mafî muzakereman heye. Ême le 'eynî muzakere da le rûy exlaqîyewe be erkî xomanî dezanîn şûra lewey rû deda agadar keyn û dezanîn ke ew muzakereye legel rêjîmî Xumeynî çî lê şîn nabê û dezanîn ke rêjîm xudmuxtarî nada be ême. Belam rêjîmî Xumeynî le teblîxat û şape û gapey xoyda berdewam îdî'a deka rêberanî Kurdistan însanî helxeletêner û serlêşêwawin ke xelik hetele deken û pêş le berqerarî aştî û aramî le Kurdistan degrin. Ke wabû ême naçarîn bo pûçelkirdnewey teblîxatî rêjîm le naw xelkî Kurdistan û dirêje dan be xebat, muzakere wekû dirêjey siyaset berew pêş berîn û êwe tematan girtuwe be pêş lê girtinî mafî dêmokratîkman lê bistênnewe. " Qasimlû lêy ziyad kird: " pêşmerge Kurdekan mawey 5 sale be dûr le xawuxêzan û debarî jiyan legel rêjîmî Xumeynî de şer dan. Destigêranewey ême le muzakere debête hoy karîger bûnî teblîxatî rêjîm le naw gelî Kurd da. Ême be muzakere kirdin be duway dû amanceweyn. Yekem ewey ke teblîxatî rêjîm pûçel keynewe û be kirdewe bo cemawerî biselmênîn  rêjîmî Xumeynî amade nîye xudmuxtarî bida be ême û lew rêgayewe rûhîyey wegerxistinî cemawerî Kurd ziyad dekeyn û dûhem deretanî pişûdan bo hêze nîzamîyekanman amade dekeyn. Ewe yekêk le qanûnekanî şerî çekdaraney cemawerî ye û êwe natuwanin bo ême û hêzekanman qanûnî tazey şer gelale biken.

Şewket: Wulamî Mucahîdîn çi bû ? 
Xanbaba Têhranî: Ewan be şîkirdnewey têrutesel sebaret be pêwîstî serewnixûnkirdinî be zebruzengî rêjîmî Xumeynî û rêkxistinî xebatî çekdarane û berperçdanewey muzakere, le wulamî qisekanî Qasimlû da rayangeyand " êwe hêzêkî cêyî û herêmîn û ême hêzêkî sertaserîn boye ber'ode bûnî ême sertaserî ye". Mucahîdîn baweryan wa bû ke tenya ew hêzey ke mafî muzakere  diyarî deka şûray Mîlî Muqawemet e  û Hîzbî Dêmokrat  yan her rêkixraweyekî dîke xawen mafêkî awa ciyawaz nîn û Hîzbî Dêmokrat debê ber'ode bê ke lewew duwawe muzakere naka. Eger ewe neka debê wez'î xoy legel şûra rûn katewe.

Dirêjey heye... 

parvê bike

   

Yeni Özgür Politika

© Copyright 2021 Yeni Özgür Politika | Mafên belavkirinê parastî ne.