Dîdarî Wefa Kirmaşanî u Celal Talebanî (7)

Sazmanî Înqilabî u Kurdistan (192)

Her yek lem şêwane, wate xebatî çekdaraney şar yan şax le helumercî taybetî xoy da dest pêdekat, geşe dekat û serdekewêt. Helumerc bo raperînî çekdaraney şar ciyaye le helumercî destipêkirdinî xebatî çekdarane le nawçey gundnişîn da.

Sebaret be raperînî çekdaraney şarî, ewe debê hemû helumercêk amade bêt, raperînî çekdarane ew kate dest pêdekat ke barudoxî zêhnî be tewawî amade bêt. Le katêkda xebatî çekdaraney gundekan yan şerî partîzanî detuwanê le helumercêk da ke xelik dijî hukûmet yan hêzî dagîrkerin, wate helumercî babetî xebat, dest pêbikat. Bêguman le weha barudoxik da pêwîste hêzêk hebêt bituwanêt weha xebatêk dest pêbikat, wate lanîkemî helumercî zêhnî amade bêt. Belam bo ewey em hêze geşe bikat debê bere bere em helumercaney duwayî bedî bên:

Hêzî destpêkerî xebatî çekdarî debê le nêw ew deste pêşrewe da geşe bikat û bigorêt bo hêzî berastî şorişgêr û wişyar

Em rêkxistine debê bituwanêt rêrewî siyasî durust û rasteqîne be pêy helumercî diyarîkiraw bedestewe bidat takû lem rêgewe bituwanê le layekewe komelan berew lay xoy rabkêşêt û le layekî dîkewe hêzî dîke legel xoy yekbixat

Hawkatî rêrewî siyasî durust, debê bere bere rêrewî serbazî durust darêjêt. Le kirdewe da bituwanê hêzekanî dujmin le kar bixat, hêzekanî xoy pere pê bidat, pêşmerge rabênêt, kadrî 'eskerî pêbigeyenêt, hêzî pêşmerge le şerî partîzaniyewe bo şerî bicûl û le duwayî da pêkhênanî hêzî çekdarî rêkxiraw berz bikatewe. Bêguman hawkat legel pere pêdanî rîzekanî pêşmerge debê bituwanê pirsî locistîk, kerestekanî şer, çekî qurs û teqemenî be başî çareser bikat.

Lebarbûnî helumercî giştî nawçeyî û nêwneteweyîş dewrêkî girîngî le geşey hêzî pêşmerge da heye ke debê leberçaw bigîrêt.

Belam sêhemîn û girîngtirîn qonaxî şer, qonaxî serkewtinî tewawe. Be giştî sê mercî serekî bo eme hen û nasrawin.

1-Bûnî hîzbêkî be rastî şorişgêr û seranserî ke le rewtî xebatî ta radeyek dirêjmaweda tuwanîwyetî xoy bikate rêberî rasteqîney gel, rêberî bereyekî yekgirtû û rêberî hêzî çekdar. Em partiye le rewtî xebat da durûst debêt û nek her legel çînî kirêkar da pêwendîyekî pitew dademezrênêt, belku debête rêberî komelanî firawanî zehmetkêşanîş. Bînay ew hîzbe le rastî da hawkate legell derkî fire rehendî doxî şoriş le wulateke da, damezrandinî hêzî çekdar û berey yekgirtû.

2-Mercî dûhemî serkewtin, hêzêkî çekdarî be radey pêwîste. Wek debînîn hêzî çekdar dewrêkî zor karîger û tenanet diyarîkerî le geşey helumerc be sûdî bizûtnewey rizgarîder û şoriş da le estoye. Be bê hêzî pêşmerge û geşey bo hêzî rêkxiraw û nîwerêkxirawî çekdar ne hîzbe pêşrew û seraseryeke durûst debêt û ne komelanî gel lêy kodebnewe û boye berey yekgirtûş rêy geşe nabrêt. Bem şêwe be bê ewey bimanewêt dewrî mercekanî dîke kem bikeynewe, debê bilêyn ke bûnî hêzêkî çekdar gewretirîn hokarî dabînkirdinî hewlumercî serkewtine.

3-Mercî sêhemî serkewtin bereyekî ber firawanî yekgirtûwe ke hemû hêzekan amaden têyda le ser bernameyekî lanîkemî yan katî û pêrewî bereke da xebat biken. Bêguman debê binçîney em bereye le zehmetkêşan pêk bêt. Em hêze mezine cemawerîye ke zaminî geşey berey yekgirtû û parastinyetî wek witman le dewrî partî pêşrrew ko debêtewe, belam debê hîşta hêzî dîkeş yekbixrêt bo ewey dujmin ta dekrêt pertewaze bikrêt û helumercî rûxandinî amade bikrêt.

Cige ew sê xaley bas kiran, le doxî taybetî Kurdistan da, debê çuwar pirsî dîke çareser bikeyn. Em çuware pêwendîyan be Iraq, Kurdistan, Rojhelatî Nêwerast û cîhanewe heye:

Pirsî yekem, pêwendî be Iraqewe heye. Hêzekanî ême le Kurdistan debê bituwanin legel hêze pêşkewtû û şorişgêrekanî Iraq da yek bigrin û hawkarî biken. Hêze Kurdekan hîçkat natuwanin be tenyayî hukumetî nawendî birûxênin, boye bo her hêzêkî Kurdistanî pêwîste hewil bo yekgirtin legel hêze şorişgêr û pêşketûwe Iraqîyekan bidat.

Pirsî dûhem, çareserî pêwendî duruste legel hêze pêşketû u şorişgêrekanî beşekanî dîkey Kurdistan û ew wulatane. Pêwîste legelyan yekbigrîn û piştgîrî ewanman hebêt. Barûdoxî beşekanî dîkey Kurdistan karîgerî leser barûdoxî Kurdistanî Iraq dadenêt. 

Sêhemîn pirs pêwendî duruste legel hêze şorişgêr û pêşkewtûwekanî Rojhelatî Nêwerast û be taybet cîhanî 'Ereb. Pêwîste hêze şorişgêr û pêşkewtûwekanî cîhanî 'Ereb bizanin ke bizûtnewey neteweyî Kurd nek her dijî ewan nîye, belkû yarîdeder û piştî xebatekey ewane û pêwîste em bizûtneweş yarmetî û piştgîrî ewanî hebêt.

Çuwaremîn pirs, pêwendîye be hêze rizgarîder û pêşkewtû û susyalîstîyekanî cîhanewe. Delên her şorişêk debê piştîwanî nêwneteweyî hebêt. Em xale sebaret ême zor rasttire. Çunku be pêy ezmûn be hoy dijayetî sê hukumetî nawendî Turkya û Iran û Iraqewe legel xebatekanî gelî kurd, ger hêze şorşigêrekan netuwanin bo xoyan hevalbendî nêwneteweyî durust biken, em sê dewlete be pêy ew tuwanayaney heyane detuwanin bizûtneweke le astî nêwneteweyî da terîk bixen. Le encam da, dozînewey piştgîrî nêwneteweyî be taybetî bo bizûtnewey gelî Kurd pêwîste.
Dirêjey heye…