Dîdarî Wefa Kirmaşanî u Celal Talebanî (14)

Sazmanî Înqilabî u Kurdistan(199)


Emroke edeb û hunerî kurd be giştî pêşkewtinxwaz û azadayixwaz e. Jimareyekî zor le edîban û hunermendanî şorişgêr hawrêy êmen û le pêwendî çirdan legelman da û êmeş hanyan dedeyn û piştgîrî kar û çalakîyekanyan dekeyn. Le êstada ême le Kurdistan dû cor kar le berey huner û edeb da dekeyn. Yekem le nawçe azad kirawekan e ke lêreda şa'îran, nûseran û şanonamenûsan û mosîqazanekan be azadî û serbilindî dexulqênin û berhemekanyan pêşkêş be gelî azad deken. Cige leme, berhemekanî ewan be şêwey corawcor dize dekate ew nawçaney le jêr sultey rêjîm dan û lewêş bilaw debinewe. Karêkî dîkeş kelik wergirtin lew hel û egere aşkirayaneye wa gel be xebatî xoy be destî hênawe. Emroke le Kurdistanî Iraq bilawkirdinewey bilavok û çalakî kultûrî û hunerî dîke le layen gelewe dekrê. Lem buwareşda kesî pêşkewtinxwaz û azadîxwaz kar deken û hewil deden (dîyare be şêwazî xoyan) em bere ye le xebatîş bixene xizmetî xebatî gel û rizgarî neteweyî. Emroke le Kurdistanî Iraq çendîn bilawkirawey edebî û hunerî derdeçêt. Le nêwan ewaneda dekrê amaje bikeyn be "Nûseranî Kurdistan" ke le nawçey azadkiraw da bilawdebêtewe. Edeb û huner le nêw gelî êmeda layengirî zorî heye û bem pêyeş rolêkî hestyaryan le estoye îş le berey edeb û hunerda beşêke le karî siyasî ke hawkat legel xebatî çekdarîda debêt pêbigat.

Pirsyar: Maweyeke rojname benawbange cîhanîyekan hewal û raportî ewe bilaw dekenewe ke Yekêtî Nîştimanî legel hukûmetî Iraq da xerîkî dan û standnin tenanet BBC îş basî ewey kirduwe ke nwênerêkî êwe bo em mebeste çote Bexda. Aya êwe dan û standin piştrast dekenewe? Êwe le kam helumercda amaden kotayî bem şerey êsta bihênin? Wek dezanîn le rabirdûşda çendîn car le Kurdistanî Iraq aştî katî berqerar buwe. Aya aştî û dan û standin karîgerî leser pêşmergekantan dananêt? Hest be metirsî ewe naken hêzekantan pertewaze bin û emeş  duwacar be sûdî dewlet bişkêtewe?

Wilam: Be manay dan û standin, ta êsta Yekêtî Nîştimanî Kurdistan dan û standinî resmî qubûl  nekirduwe. Dewlet daway dan û standinî  kirduwe, belam ême qubûlman nekirduwe. Belam le nêwan ême û ewanda kesanêk hatûn û çûn. Dewlet kesayetî dînî û kesanî nasrawî nardote laman. Ewaney le lay dewletewe hatûn pêman delên dewlet daway dan û standinî kirduwe, mercekanî êwe çîye? Yekêtî Nîştimanî dan û standinî resmî qubûl nekirduwe. Belkû daway le dewlet kirduwe le pênawî misogerbûnî dawakanî gel da hengaw binêt û siyasetî şovênîstî xoy le beramber gelî Kurd da bigorêt. Le salî 82 da rêpêwanêkî heme layene le seranserî Kurdistan kira. Rêpêweran nwêneranî gelî Kurd bûn û dawakanî ewanyan nwênerayetî dekird.

Êmeş le lay xomanewe piştgîrî ew dawayaneman kird. Be dewletî Iraqman wit be kirdewe dawakarî rêpêweran cêbecê biken tawekû rêge bo dan û sitandin xoş bê.

Daway em rêpêwane berbilwane bem şêwey xuwarewe bû:

Yekem: Gêranewey cutyare koçênrawekan bo gundekanî xoyan.
Duwem: Azadkirdinî sercem zîndanîye siyasiyekan û binemaley pêşmergekan.
Sêhem: Çûne derewey hêze çekdarekanî dewlet le Kurdistan.
Çuwarem: Misogerbûnî xudmuxtarî rasteqîne bo Kurdistan û dêmokrasî bo Iraq.
Pêncem: Be Kurdîkirdinî qutabxanekanî Kurdistan.
Şeşem: Kokirdnewey rêkxirawe emnîyekan le Kurdistan.

Emane dawakarî reway xelke û ême dawaman le dewlet kirduwe wilamî em daxwazyane bidatewe. Belam boçî ême bem şêweye legel dewlet mamele dekeyn û boçî be resmî naçîne dan û sitandnewe legelyan? Be hoy ewey ême leser ew bawereyn nawerokî çînayetî û siyasî dewletî nawendî gorranî beserda nehatûwe. Siyasetî şovênîstî zal be ser dewletda wek xoy mawetewe. Çareserî kêşey Kurd be mana rasteqînekey le çuwarçêwey dewletêkî dêmokratîk da dête dî û dewletî êsta helgirî ew taybetmendîyane nîye. Ême leser ew bawereyn ke rêjîmî Bexda debê bigorêt. Dêmokrasî cêgey dîktatorî henûkeyî bigrêtewe. Dewletî îtîlafî bête ser kar û be kirdeweş xudmuxtarî bo Kurdistan û dêmokratî bo Iraq desteber bikat u kotayîş be şer legel Iran bihênêt. Hêze çekdarekanî Iraq le birî xo xeric kirdin be şerî Kurdistan û şerî Iran û Iraq piştîwanî gelanî Felestîn û Surya biken ke rûberûy Emrîka u Israyîl bûnetewe.

Bêmitmaneyî ême sebaret bewey dewletî henûkey Iraq amade bêt wilamî amanc û xuwastekanî gelî Kurd bidatewe û biçêt be pîlyanewe zore, çunkû eme dewletî borjiwaburukratîk şovînîstîye ke tenya berjewendîyekanî xoy mebeste. Belam le mêjû da rêkewtûwe dewletêk naçar bêt mil be karî weha bidat. Debê leser em egere îş bikeyn ke helumercî babetî û guşar bo ser dewletî Iraq bibête hoy be corêk le corekan rêkewtin legel beşêk le dawakanî gelî Kurd. Le helumercêkî wehada ême be pêy barudoxî babetî û zeynî û diyarîkirawî şoriş û dêmokrasî deçîne pêşewe. Ême xebatî xoman be xebatêkî dûr u dirêj dezanîn û wek leserewe basim kird, xebatî ême xebatêkî esteme û nakokî zorî hen ke debêt çareser bin. Eger ême em taybetmendyaneman le ber çaw bêt le taktîk da nermî binwênîn û agaman le pêşkewtinî qonax be qonaxî xebatekey xoman bêt. Ême îrademan kirdûwe hawkat legel gelî Kurd bo geyiştin be sercem mafekanman ta kotayî xebat bikeyn. Eme amancî balay êmeye û hîçkat çawpoşî lê nakeyn.
Belam bo geyiştin bem amance balaye ême naçarîn rêgay dûrudirêj bibrîn û be pêç û penay zorewe têperîn û lem rêpêwaneşda carcare be kurtî pişû bideyn. Dan û sitandin u aştî xoy corêke le corekanî xebat û derencam û kotayî şere.


Dirêjey heye…