Li Herêma Firatê, Navenda Rêxistina Nûdem bi wesîleya 3’yê Kanûnê, Roja Astengdaran a Cîhanê, li Parka Ronîwar a Kobanê şahiyek li dar xist.
Di sala 1992’yan Neteweyên Yekbûyî (NY) roja 3’ê Kanûnê weke Roja Astengdariyê ya Cîhanê diyar kir.
Bi vê boneyê Rêxistina Nûdem, li parka Ronîwar a Kobanê şahiyek li dar xist. Di şahiyê de bi sedan zarok û malbatên wan amade bûn.
Zarokan cil û bergên xwe yên kurdî li xwe kirin.
Ji Rêveberiya Desteya Jinan a Herêma Firatê, Cîhan Derwêş di şahiyê de got; "Rojane êriş li dijî herêmên me hene. Di encamê de derûniya zarokan xira dibe. Lê ji bo jiyaneke ewle, em ê ji bo zarokên astengdar dest bi projeyan bikin. Em vê rojê jî li tevahî zarokan pîroz dikin."
Komên mûzîkê yên zarokan ên Hîlala Zêrîn bernameyên xwe pêşkêş kirin û zarokên astengdar jî dîlan girt.
ANHA / KOBANÊ
