Ava paqij nîne nexweşî belav dibin

Ev 34 roj in dorpêça li ser Kobanê didome. Rojnameger Hêvîdar Heranî, diyar kir ku ji ber îstasyonên avê di destê komên girêdayî Hikûmeta Demkî ya Şamê de ye gihîştina avê zehmet e û got ev rewş dibe sedama nexweşiya zarokan û belavbûna nexweşiyan. Hêvîdar Heranî diyar kir ku ev mehek e bajar di bin dorpêçek giran de ye û tenê ceyaran hatiye dayîn û gihîştina kelûpelên bingehîn hatine astengkirin. Hêvîdar Heranî anî ziman ku nexasim bi meha Remezanê re jiyana gel dijwartir bûye û got:“Em di meha Remezanê de ne. Lê belê gelê Kobanê di nava mercên giran de dijîn. Dorpêç didome û heta niha tenê ceyran hatiye dayîn.” Hêvîdar Heranî anî ziman ku ji ber koçberan hejmara nifûsa bajêr zêde bûye û got:“Malbat, di dibistanên Kobanê de di nava mercên dijwar de dijîn. Kêmasiyên nan, xurek, şîr û avê hene. Av qirêj e, lewre istasyona navendî di bin kontrola çeteyên girêdayî Şamê de ne. Ev rewş dibe sedema nexweşiya zarokan û belavbûna nexweşiyan. Alîkariyên ku digihîjin bajêr, têrê nakin. Pirsgirêka gelê Kobanê bi çend wesayîtên alîkariyê ve çareser nabe, pêdeviya esasî ew e ku divê rê bi tevahî bên vekirin û zarokên nexweş û nexweşên giran ji bo nexweşxaneyên Qamişlo û Helebê bên veguhestin.”

MA/MELÎK VAROL