Ji weşanxaneya Nûbiharê 5 kitêbên nû

Nûçeyên Çand/Huner

Çarşem 6 Cotmeh 2021 - 01:28

Weşanxaneya Nûbiharê 5 kitêbên bi Kurmancî çap kirin. Du ji wan çîrok in, yek ji wan roman e û du yên din jî werger û lêkolîn in.
Nivîskar Diya Ciwan bi kitêba “Kenê Reş” li gel bibîranînên xwe behsa jan û êşên jina Kurd dike. Rojbîn Ozkan jî bi kitêba xwe ya çîrokan ya bi navê “Qenewîç” bi zimanekî nûjen evîn, kul û keser û pirsgirêkên jina Kurd anîye ziman. Her weha di naveroka van çîrokan de berxwedana jin û keçên Kurd jî xuya dibe. Hinek caran têkiliyên nifşê nû û yê berê bi çavê lehengên çirokên xwe tîne pêşberî me.

Mezher Botan bi romana “Berxwedan” silavê li xwînerên Kurd dike û karakterê romana xwe Dawûd wiha dide nasîn, “Dawûd di nava tengahiyê de ye. Herku diçe cih lê tengtir dibe. Bitenêbûn jî gelşek mezin e. Di nava rewşa neçê de Dawûd piço piço bi alemek din dihese. Bi tev tirsa xwe ve teslîm nabe û li ber xwe dide. Bi ayetên Qurana pîroz xwe diparêze. Ev pirtûk bi Berxwedanê didome û li vir naqede.”

Hêrîş Kemal Rêkanî bi “Hîkayetêd Kurmancî” berê xwe daye kitêba Mela Mehmûdê Bazîdî û ev berhem ji nûve çap kiriye. Piştî pêşgotina vê kitêbê û latînîzekirina wê, li dawiyê, destxeta wê jî bi awayekî rengîn hatiye bicîkirin. Rêkanî ji bo vê kitêbê dibêje,

“Yek ji wan berheman jî ev kitêba wî ya Hîkayetêd Kurmancî ye ku ji 84 hîkayetan pêk hatiye û heta niha wek pirtûk çap nebûye. Ev hîkayetana kurt in, lêbelê xudan-naverok û derbirînên tijî pend û serboriyên berkeftî û hêja ne.”

Nivîskar Hayrullah Acar jî bi kitêba “Eşqname” 100 xazelên Mewlana yên bijartî ji Farisî wergerandiye Kurmancî û heya niha xebateke wiha pêk nehatiye. Acar ji girîngiya vê kitêbê wiha tîne ziman, “Ev gulbijêra ku ji wergêrana sed xezelên bijartî ya Dîwana Kebîr a Mewlana pêk hatî, di Kurmancî de xebata yekem e. Wergêrana xezelan bi awayê menzûm hatiye kirin.

Herweha digel wergerê, metnê orjînal yê Farisî jî li hember wergerê hatiye danîn.

NAVENDA NÛÇEYAN

parvê bike

   

Yeni Özgür Politika

© Copyright 2021 Yeni Özgür Politika | Mafên belavkirinê parastî ne.