Êdî nema dikare bê hevdîtinan

Li gorî Rapora Mehkûmên Nexweş a ÎHD’ê hezar û 412 girtiyên nexweş hene ku herî kêm 335 ji wan rewşa wan giran e. Li gel serlêdanan jî nayên berdan. Yek ji girtiyên ku êdî bi tena serê xwe nikare jiyana xwe dewam bike Mehmet Emîn Çam ê 73 salî ye ku li gel du caran krîza dil derbas kir û gelek caran rakirin nexweşxaneyê nayê berdan. Serlêdana herî dawî ya ji bo Mehmet Emîn Çam hate kirin, bi rengekî neyînî bi encam bû.

Parêzer Nezahat Celen anî ziman ku pêvajo bi rengekî wijdanî û hiqûqî nayê meşandin û ji bo “Ji bo mafê jiyanê divê bi lez biryar bê wergirtin” bang kir û got:“Ew nema dikare li girtîgehê bimîne. Muwekîlê min doh rakirin nexweşxaneyê. Me di daxwaznameya xwe ya beriya niha de gotibû, rîsk heye ku careke din krîza dil derbas bike.” Celen ragihand ku Çam dikare careke din bypass yan jî emeliyata dil derbas bike û got:’’Mixabin niha li Girtîgeha Beşîrî pirsgirêkeke giştî ya avê heye. Ji ber vê yekê li gel hevalên wî yên li koxûşê muwekîlê min jî rakirin nexweşxaneyê. Du caran birin nexweşxaneyê. Muwekîlekî min ê din ê li heman koxûşê emeliyat bûbû. Girtiyekî din jî ji ber nexweşiya gurçikê li nexweşxaneyekê ye.”

Celek diyar kir ku muwekîlê wî zehmetiyê dikişîne ku li girtîgehê jiyana xwe dewam bike û got:“Dema dawî nikare bimeşe, bi nexweşiya dil e, çavên wî nabîne. Nikare derkeve hevdîtinan. Herî dawî dema ku hempîşeyekî me çû hevdîtinê, nikarîbû tevlî hevdîtinê bibe. Ji ber ku nikare bimeşe, li gel hevalekî ku ketibû bin çengê wî, tevlî hevdîtinê bûbû. Gardiyanan ji me re gotin, ‘Gelo hûn neyên hevdîtinê wê nebe, ji ber ku muwekîlê we gelekî diêşe, nikare bimeşe’. Milê xwe yê çepê qet nikare bilivîne. Li xwe kêm kiriye. Ji ber ku bi zehmetî dimeşe, hevdîtinê qebûl nake. Du rehên wî girtî ne, dibe ku careke din bypass bibe. Ji bo sererastkirinan komîsyonek ava bû lê belê ji vê komîsyonê biryarek derneket. Mafê jiyanê mafê bingehîn e. Têkildarî girtiyên nexweş divê tavilê biryar bê dayin. Girtîhiştina wan bi kêrî kesî nayê. Lewma divê tavilê rewşa wan bê sererastkirin, başkirin.”

ANF/SÊRT