Xetereya ekokujiyê heye

Konseya Bajêr a Amedê dê li Navenda Çand û Kongreyê ya Çand Amed'ê 32'yemîn Lijneya Giştî ya Asayî bi dirûşmeya "Bila bêhna rihanê ji Hevselê bê, bila Dîcle bi azadî biherike, bila Pira Deh Derî ji bo gel bimîne" li dar dixe. Rojeva sereke ya civînê dê parastina Baxçeyên Hevsel û Pira Deh Derî be. Zirara ku ji ber avakirina bêplan a li vê deverê kom bûye, dê di nav mijarên pêşîn ên Konseya Bajêr de be. Tê payîn ku di lijneyê de nûnerên rêxistinên civaka sivîl, rojnamevan, raya giştî û gelek saziyên bajêr beşdar bibin, gavên girîng der barê paşeroja Baxçeyên Hevsel û Pira Deh Derî de werin avêtin. Sekretera Giştî ya Konseya Bajêr a Amedê Selvî Tûnç, der barê civîna lijneyê de axivî. Selvî Tûnçê diyar kir ku wê Konseya Bajêr ku ji 350 sazî û rêxistinan pêk tê, biryarên girîng ji bo bajêr bide û got:"Meclisa Bajar di esasê xwe de mekanîzmayek e ku pirsgirêkên ku bajar pê re rû bi rû dimîne û çareseriyên pêşniyazkirî lê tên nîqaşkirin. Ew ne tenê pêkhateyek ji rêveberiyên herêmî ye, lê avaniyek e ku hemû rêxistinên civaka sivîl û saziyên giştî yên li Amedê dihewîne. Nêzîkî 350 sazî beşek ji vê avaniyê ne û em salê du an sê caran civînên tematîk li dar dixin." Selvî Tûnçê destnîşan kir ku ew ê ji bo pêşeroja Baxçeyên Hevsel û Pira Deh Derî li hev bicivin û got:"Di salên dawî de, wêrankirina li dora Pira Deh Derî û li Baxçeyên Hevselê gihîştiye astekê ku hemû deverên bajêr aciz dike. Dagirkirinên neqanûnî û avakirinên bêdestûr xwezaya herêmê wêran dikin, zirarê didin avahiyên heyî û bi rastî, herêmê bi xetereyeke 'ekokujiyê' re rû bi rû dihêlin. Em ê li ser tiştên ku em dikarin li dijî vê pirsgirêka mezin dibe bikin nîqaş bikin û biryarên berbiçav bidin."

Ew ê çareserî bê nîqaşkirin 

Selvî Tûnçê diyar kir ku Baxçeyên Hevselê û Pira Deh Derî di xetereyeke cidî de ne û got:"Wekî ku tê zanîn, Baxçeyên Hevselê avaniyeke ku di Lîsteya Mîrata Çandî ya Cîhanê ya UNESCO'yê de cih digire. Lêbelê, ji ber zirara ku di salên dawî de çêbûye, ew bi xetereya derxistina ji lîsteyê re rû bi rû ye. Ev rewş dê di demeke dirêj de bi gelek awayan zirarê bide bajarê me." Selvî Tûnçê girîngiya vê lijneyê ji bo niştecihên bajêr ji bo nîşandana îradeya xwe destnîşan kir û got:"Baxçeyên Hevsel û Pira Deh Derî mîrateya hevpar a vî bajarî ne. Ji ber vê yekê, her kesê ku li vî bajarî dijî di van avaniyan de xwedî gotin e. Di vê çarçoveyê de, me serdana hemû saziyan kir û ew vexwendin lijneyê. Wê rojê, pêşkêşiyên ku vê pirsgirêkê ji aliyên wê yên dîrokî, qanûnî û ekolojîk ve çareser dikin, dê werin dayîn. Ew ê lijneyek be ku gelek sektor wê li çareseriyan bigerin. Bila nûnerê her saziyekê bi pêşniyazek çareseriyê were da ku ev pêşniyaz ji hêla her kesî ve werin nîqaşkirin û biryarek were dayîn."

MA/FETHÎ BALAMAN