Seferberiya demokratîk xurt bikin

• Endama Konseya Serokatiya Giştî ya KCK'ê Sozdar Avesta bang kir ku seferberiya demokratîk a ji bo azadiya fîzîkî ya Rêber Apo hîn bêhtir bê mezinkirin.

Endama Konseya Serokatiya Giştî ya KCK'ê Sozdar Avesta di bernameya taybet a Stêrk TV de bi wesîleya 4'ê Nîsanê rojbûna Rêber Apo têkoşîna gelê Kurd, şert û mercên Îmraliyê û bûyerên di rojevê de ne nirxand. Sozdar Avesta derbarê rojbûna Rêber APO de ev nirxandin kirin:’’Ne tenê li Kurdistanê, li tevahî cîhanê û parzemînan, gelê me, dostên gelê me û kesên ku fikir û felsefeya Rêber Apo nas kirine vê rojê pîroz dikin û wekî rojbûna xwe dibînin. Em dikarin bi rehetî bibêjin ku Rêber Apo di herikandina jiyanê ya 76 salan de ji 6 saliya xwe heta niha di nava têkoşînekî mezin de ye. Lêgerîna heqîqet, azadî, demokrasî, wekhevî, hevaltî, eşq, hezkirin kir û bi vî rengî meşekî bê navber ji zarokatiya xwe ve domand. Ev ked û meşa Rêber Apo ya azadiyê, ev meşa Rêber Apo ya heq, hiqûq, edalet û wekheviyê bi hemû awayî ket hizmeta civak û gelan. Ev yek hişt ku her kes vê rojê wekî roja xwe bibîne. Ji ber ku fikr û felsefeya Rêber Apo ji xwe re wekî rênîşander dibînin, wekî zanebûnê dibînin. Dibe ku mînaka yekemîn e ku bi mîlyonan hezkiriyên wî hene. Jin ji xwe re wekî hevalekî dibînin, hevalê jin ê zaroktiyê ye. Yanî herî zêde jî Rêber Apo di mijara jin de van nakokiyan geriya û îro di mijara jinê de derketina mezin da avakirin. 

Tecrîda li ser Rêber APO didome

Sozdar Avesta derbarê banga Rêber APO de jî wiha axivî:’’Rêber Apo ev banga dîrokî wekî manîfestoya sedsalî ya pêşiya me, hezar salên pêşiya me pênase kir, tevahî Tevgera Azadî û gelê me jî wisa pêşwazî kir û xwedî lê derket. Bi mîlyonan kes pêşwazî kir bi taybetî jî di 8’ê Adar û Newrozê de. Cara yekemîn bi vê girseyîbûnê ev qas xwedî derketina li vê bangê çêbû. Lê me dît ku piştî bangê pêngavên din pêş neketin bi taybetî jî ji aliyê dewletê ve. Tevgera me, hevserokatiya me, Navenda Parastina Gel daxuyaniyên pêwîst dan. Ji heman tiştî gotinê zêdetir, divê mirov bîne hinek tiştan xet bike. Tiştên hatin gotin nirxandinên tevgera me ne. Nêrînên têne zanîn. Ev pêngav ne yek alî ye. Berovajî mehek bi ser de derbas bû, hevdîtin nehatin kirin. Careke din tecrîdê domandin. 

Ji agirbestê aciz bûn

Dema Rêber Apo bang kir, dibe ku di nava bangê de nebû lê belê bi heyeta çûbû derkete gelek bernameyan. Di çapemeniyê de axivîn. Bal kişandin ser provokasyonan. Heman demê Bahçelî û Erdogan jî bal kişandin ser. Lê balkişandina Rêber Apo cuda ye, yên van cuda ye. Rêber Apo bi hemû hêza xwe, bi tecrûbeya xwe ya salên dirêj û pêşdîtinên xwe vê yekê dike. Rêber Apo hîn di salên dirêj ên beriya niha de got, 'Mekanîka darbeyê di dewreyê de ye'. Salên derbasbûyî piştî ku darbe çêbû, rabûn hinekan gotin li Tirkiyeyê darbe çêdibin. Rêber Apo berî hingî dibîne. Niha êrîşên ku we got, êrîşên hem li ser civakê, hem li ser Herêmên Parastinê yên Medyayê, li ser Şengalê, li ser Rojava tiştek ji wan kêm nebûye. Dewleteke, Wezîrê wê yê Parastinê, dewleteke ji agirbesta me aciz bû. Dibêje we çima agirbest îlan kir. Dibêje, 'Rêberê wan got, bila çekan berde, wan agirbest îlan kir'. Agirbest hate îlankirin, ji bo tu provokasyonan neke. Bi esasî ji wê aciz bûn. Ji bo provokasyonan bikin û gerîla jî bersivê bide, vê biavêjin ser gerîla. Lê belê gerîla bi pêşdîtinekê ji bo provokasyona çênebe, ji aliyê dewletê ve çênebe, gerîla nekeve nava provokasyonê, agirbestek hate çêkirin. 

Divê herkes derdorê şîn bike

Beriya niha bi demeke kurt li Parlamenta Ewropayê konferanseke Kurd hate lidarxistin. Gelek kesayet; kesayetên xwediyê Xelata Aştiyê ya Nobelê, zanyar, nivîskar, akademîsyen, hunermend, dîroknas, Kurd, ji nava tevahiya cîhanê kesayet tevlî bûn. Hem amadekarên konferansê hem jî beşdaran hemûyan silav dikim û wan pîroz dikim. Bi rastî jî xebateke gelekî girîng bû. Yek; ew sûcê li dijî mirovahiyê, sûcê li hemberî gelê Rojava, qirkirina ku hate kirin li Dadgehekê hate darizandin. Yek jî konferans bû, li ser banga Rêber Apo. Divê bersiveke çawa ji vê bangê re bê dayin, hinek biryar wergirtin. Û derhal bang kirin ku divê Rêber Apo ji aliyê fîzîkî ve azad bibe. Ev biryar rast e, di cihê xwe de ye. Piştî konferansê 200 kesayetan ku di nav de xelatgirên Nobelê jî hebûn dîsa bang kirin û pêngaveke dan destpêkirin, ji bo îmzeyan kom bikin. Ez bi navê gerîlayên azadiyê, bi navê tevgera me ya jinan wê silav dikim. Peyama ji bo yekîtiya Kurdan jî bi heman rengî ye. Bingeheke xurt a yekîtiya neteweyî bi pêş ketiye. Hemû cûreyên xebatan li ser fikir û ramanên Reber Apo heta asta jor divê pêşengî jê re bê kirin. Li her cihî li ser vê mijarê vegotin bêne kirin, konferans bêne lidarxistin, perwerde bêne pêkanîn. Divê fikir û ramanên Rêber Apo bi vî rengî bê belavkirin. 4'ê Nîsanê rojbûna Rêber Apo tê pîrozkirin. Pîrozbahî têne lidarxistin, gelê me pêk tîne. Zarok jî çêdikin, pasta jî çêdikin. Tercîha wan e, em tiştekî jê re nabêjin. Lê belê Rêber Apo li şûna vê got, divê bêhtir daran biçînin, her kes derdora xwe xweşik bike, paqij bike, çêbike. Ji xwe destpê bike. Milê wê yê etîk û estetîk hîn bêhtir bi pêş bixîne. 

NAVENDA NÛÇEYAN