Ketim

Sêşem 22 Îlon 2026 - 21:58

Ketim, lê rabûm; dîsa ketim, lê dîsa rabûm, wekî her car rabûm û radibim. Ev ne cara yekê ye û ne jî ya dawiyê ye, carinan di cî de radibûm û carinan bibirîn û çavên şil radibûm û radibim. Carcaran ez dibûm mêvanê nexweşxaneyanû bi cebara sipî dihatim xelatkirin, cebara sipî min ji ketinê diparast û min bê hereket û tevger dikir.

Ne xem e...
Min got:
– Ez ketim.
Apê Aristo bersiva min bi dilxweşî da û got: – Ketin ne ketine, ketin ji erdê ranebûne.

Erê ez diketim, lê radibûm; ez dikevim, lê radibim. Yan ez aşiqî erdê bûme yan jî erdaşiqî min bûye, jixwe ez û ew bûne yek birîn, yek evîn. Evîna min a axa erdê evînekezor e, dijwar e û hêsan e. Evîneke biêş û bikêf e, evîneke li ser evînê re ye, ji ber kudizanim ew ê bi min re rast be û tu carî dev ji min bernede.

Ketim...

Ên li jêr ji ketinê natirsin.

– Dibe ku her ketinek serkeftinek be, lê her serkeftinek ne ketinek e!

Nizanim, tenê dizanim ku ez ketim, dikevim û dê bikevim.

Ketim...

Çongên min; çongên min mor û reş dibûn. Min dizanîbû ku ez cuda me, ma kes jibilî min heye ku çongên wan keskesorî dibe...?

Nizanim dibe ku hebe jî...

Erê ketim.

Di xew de jî carekê ketim, di xewna xwe de jî ez li erdê bûm; erê ez ketibûm. Mêvanekî xewna min hebû, got:

– Ez ji cihekî dûr ve hatime ba te û navê min Kunfoşîz e, nameyeke min ji te re heye. Tu, tu caran neketibe ne rûmeteke mezin e, rûmeta mezin rabûna piştî her ketinekê ye.

Bi dawiya gotina wî re ez ji xew rabûm, ez ji erdê rabûm. Cilên min; cilên min tu carî orjînal nediman, her ketinekê li dewsa xwe pîneyek dixwest, bi her ketinekê re parçeyek qumaş li cilên min dibûn bar û ez bi wan cilan dibûm dara miradan.