Rexed Sedam Hisên amadekariyê dike

Akademîsyen Kamûran Berwarî diyar kir ku keça Sedam Hisên, Rexed Sedam Hisên, xwe ji bo encamên destwerdana li Iraqê amade dike û got: "Lêbelê, ev ne mimkun e. Gelê Iraqê komkujî dîtiye; ne keça Sedam, ew ê nehêlin ku tu Baasîst li Iraqê bibe desthilatdar."

Bandorên vê raporê ji aliyê malpera Fox Press a bi zimanê Erebî ve berdewam dikin ku ragihandibû Rexed Sedam Hisên, keça serokê rejîma Baasê yê Iraqê yê hilweşiyayî Sedam Hisên, di 16'ê Çileyê de di bin kontrol û çavdêriya Îngilistan û Urdunê de li Şamê bi Ahmed Şara re civiyaye. Serokê Partiya Rizgariya Neteweyî ya Sûriyeyê Mihemed Muwalid, hevdîtinê piştrast kir û diyar kir ku Rexed Sedam Hisên piştî hevdîtina bi Şara re li Şamê bi şandeyeke Îsraîlê re jî civiyaye. Eşkerekirina vê hevdîtinê û gefên Wezîrê Karên Derve Hakan Fîdan ên di bernameyeke televîzyonê de di 10'ê Sibatê de der barê Şengalê de wekî bi hev ve girêdayî hatin şîrovekirin. Rastiya ku Serokkomar û Serokwezîrê Iraqê û Hikûmeta Herêma Kurdistanê piştî çend mehan hîn hikûmet ava nekirine, teoriyên ku balê dikişînin ser Iraqê xurt dike.

Cîgirê Serokê Akademiya Siyaset û Ramana Demokratîk a Herêma Kurdistana Federe Kamuran Berwarî, li ser hevdîtina di navbera Rexed Sedam û Ahmed Şara û bandorên wê li ser Iraq û Herêma Kurdistana Federe axivî.

Kamûran Berwarî diyar kir ku hevpeymaniyeke Sunnî ku ji aliyê Pakistan, Qeter, Erebistana Siûdî, Urdun, Sûriye û Tirkiyeyê ve hatiye avakirin, ji bo dijberiya hevpeymaniya Şîe ya ku dixwaze bandora xwe li Rojhilata Navînê zêde bike, di dewrê de ye. Kamûran Berwarî got: "Hin rêberên Sunnî yên ku berî hilweşîna Sedam li Iraqê bûn, ji hingê ve çûne Urdun, Tirkiye, Qeter û hin welatên Ewropayê bi hêviya vegerê. Gavên ji bo vegerandina herêmê di bin bandora Îslama siyasî de tên avêtin. Amadekariyên ji bo vê yekê demeke dirêj e didomin. Wekî beşek ji van amadekariyan, Sûriye ku di bin kontrola Tirkiyeyê de ye, di planê de cih girtiye. Hevdîtina keça Sedam bi Şara re di vê çarçoveyê de bû. Keça Sedam xwe ji bo encamên destwerdana li Iraqê amade dike. Lêbelê, ev ne mumkin e. Gelê Iraqê qetlîam dîtine; ne keça Sedam, ew ê nehêlin ku tu Baasîstli Iraqê bibe desthilatdar."

Kamûran Berwarî behsa hevdîtinên keça Sedam û Ehmed Şara kir ku di bin çavdêriya Îngilistan û Urdunê de hatine lidarxistin û got: "Urdun wekî baregeheke Îsraîlê kar dike. Urdun her tim berjewendiyên dewletên Rojavayê parastiye. Nexşeyên Rojhilata Navîn ên ku di 300 salên dawî de hatine guhertin, her tim di bin çavdêriya Îngilistanê de hatine guhertin. Ingilistan di sedsala 21'ê de jî vê rolê didomîne."

Kamûran Berwarî, têkiliya di navbera gefên dawî yên Wezîrê Karên Derve Hakan Fîdan ên li dijî Şengalê û hevdîtina keça Sedam û Ahmed Şara de destnîşan kir û wiha dewam kir: "Li Rojavayê her tişt bi eşkereyî dihat kirin. Amadekariyên van êrişan demeke dirêj e didomin. Wan êriş kirin da ku Rêveberiya Xweser a Demokratîk a li Rojavayê û bandora paradîgmaya Abdullah Ocalan ji holê rakin. Ew naxwazin gelên Rojhilata Navînê bi hev re, wekhev û azad bijîn. Armanca wan dagirkirina Çiyayê Şengalê û bidawîanîna xweseriya Şengalê ye. Ji bo êrişkirina gerîlayên li Zapê rêyên stratejîk ava dikin. Divê Kurd li ser bingeha yekîtiyê bersiva van êrişan bidin.”

MA / ŞIRNEX / EMRÛLLAH ACAR