Pîrozbahiya bi heybet a gerîla

Gerîlayên Azadiyê yên Kurdistanê Cejna Berxwedana Neteweyî bi coşeke mezin pîroz kirin. Gerîlayan tim û tim dirûşmên "Bijî Serok Apo" û "Bê Serok jiyan nabe" qîriyan û govend gerandin.

Gerîlayên Azadiyê yên Kurdistanê Cejna Berxwedana Neteweyî li Herêmên Parastinê yên Medyayê bi coşeke mezin pîroz kirin. Ji fermandarên HPG'ê Cûma Bilikî li merasîmê axivî û cejn li Rêber Apo, şehîdên Kurdistanê û gelan pîroz kir. Bilikî anî ziman ku di şexsê Sabrî Tendurek û Masîro Gabar de bi ked û îradeya bi hezaran şehîdên leheng û bi saya felsefeya Rêber Apo dîrok ji nû ve hatiye nivîsandin û gelê Kurd gihîştiye azadiya xwe. Bûma Bilikî bal kişand ser Pêvajoya Aştî û Civaka Demokratîk û destnîşan kir ku wê heta dawiyê dilsozê Rêber Apo bin û têkoşîna xwe bigihîn asteke hîn nûjen. Piştî axaftina Cûma Bİlikî gerîlayan dest bi pîrozbahiyê kirin. Di pîrozbahiyê de çalakiyên çandî yên Koro, Govend û Skeçê hatin lidarxistin.

Ji gerîlayên HPG'ê Elîşêr Kafya li ser Cejna Berxwedana Neteweyî axivî û got:"Beriya her tiştî em li Rêber Apo û tevahiya gelê xwe pîroz dikin. Weke gerîla em tevlî pêvajoyê dibin ku Rêbertî da destpêkirin. Em heta dawiyê ji Rêberê xwe bawer dikin û heta ji me bê em ê tevlî vê pêvajoyê bibin."

Gerîlaya YJA Starê Rojda Zendûra jî got:"Pêvajoya ku hate destpêkirin bi saya Rêbertî û hevalên şehîd e. Li ser vê bingehê em careke din vê cejnê li Rêbertî, şehîdan û hevalan pîroz dikin." Gerîlaya YJA Starê Delîl Reqa jî got:"27'ê Mijdarê bi taybetî li Rêber Apo, li şehîdên şoreşê, şervanên jin ên Kurdistanê û cîhanê pîroz dikim. Weke jineke Ereb di nava tevgera azadiyê de me û gelekî kêfxweş im. Bi saya Rêber Apo em gihîştin vê roja pîroz ku bi rengekî azad dijîn û ji ber vê yekê em ê her tim dilsozê Rêber Apo bin, ji xeta Rêber Apo dernekevin." Di dema pîrozbahiyê de gerîlayan dirûşmên "Bijî Serok Apo" û "Bê Serok jiyan nabe" qîriyan û govend gerandin.

BEHDÎNAN