Peyman pêk bê jiyana hevbeş pêk tê

Hevserokê Federasyona Lêkolînên Îslamî ya Mezopotamyayê (MÎA-FED) Abdullah Sagir banga azadiya fizîkî ya Rêber APO kir û got ku ji bo avakirina aştiyê azadiya fizîkî girîng e. 

Sagir destnîşan kir ku şerê demdirêj a li Rojhilata Navînê ji nepejirandina hevdu ya mirovan tê û got:"Sedema pevçûna berdewam a li Rojhilata Navînê ew e ku mirov hevdu qebûl nakin. Ji bo ku şer bi dawî bibe, divê em hevdu qebûl bikin. Îslam jî vê yekê ferman dike. Ol û maf hewce ne ku jiyaneke hevpar biafirînin. Di vê jiyanê de, rêzgirtina ji bo ol, ziman û nasnameyan pir girîng e. Her mirov bi çanda xwe xweşik e. Pergalek heye ku li ser tunekirin û kuştina hev du hatiye avakirin. Di vê pergalê de, nasnameyek dixwaze serdestiya xwe li ser nasnameyeke din ava bike û ji holê rake. Ew difikire ku ew ê bi vê yekê bi ser bikeve. Lêbelê, windahiyeke mezin e. Birêz Ocalan behsa qebûlkirina hev du û avakirina jiyaneke hevpar di modernîteya demokratîk de dike. Divê hûn ji bo yên din jî heman tiştî bixwazin ku hûn ji bo xwe dixwazin. Ger hûn vê yekê daxwaz bikin, hem hûn û hem jî yên din dê pêş bikevin." Sagir destnîşan kir ku dewlet dixwazin olê bikin amûreke desthilatê û got:"Di olê de tolerans heye, lê ew nikare di pratîkê de were sepandin. Berevajî vê yekê tê kirin. Ol ji hêla dewletan ve wekî amûreke desthilatê tê bikaranîn. Li Sûriye, Tirkiye û Îranê rewşek heye ku Kurd nayên qebûlkirin. Ew êrişî Kurdan dikin ji ber ku wan wekî gefek li ser rejîmên xwe yên zordar dibînin."

Jin û Îslam 

Sagir destnîşan kir ku têgihîştinek heye ku jinan wekhev nabîne û got:"Têgihiştinek heye ku jinan wekhev nabîne. Mêr jinan wekhev nabînin. Me bi xwe ev veguherîn nedîtiye. Hawîrdorek heye ku zextê li jinan dike û mafên jinan nabîne. Ger hûn ji bo xwe tişteki dixwazin, hûn ê ji bo jinan jî bixwazin. Hûn ê ji bo avakirina jiyaneke hevpar têkoşîneke hevpar bidin."

Ehlaqê şer 

Sagir destnîşan kir ku dewletên ku îdia dikin ku Misilman in, bêyî ku ehlaqê şer hebe, şer dikin û got:"Di şer de hûn nekarin mudaxeleyî zarok, jin an birîndaran bikin. Hûn nikarin êrişî nexweşxaneyan bikin. Îslam vê yekê ferman dike. Lêbelê, dewletên ku xwe Misilman bi nav dikin, tam berevajî vê yekê dikin. Em ê her gav li dijî van nêzîkatiyên nemirovane bisekinin. Di Îslamê de, koçberkirina kesekî ji axa wan gunehekî mezin tê hesibandin. Ew dagirkirina axa kesekî din qedexe dike. Gunehekî pir mezin e. Yên ku vê dikin û piştgiriyê didinê zalim in. Xwedê ji zaliman hez nake, bêyî ku ola wan çi be. Ger kesek axa xwe biparêze, ew kes wê biçe bihuştê. Parastina axa xwe di olê de ferz e. Gelê Kurd bi salan e axa xwe diparêze. Serkeftin wê ji bo gelê Kurd be. Xweparastin ferz e. Parastin pîroz e."

Peymana Medîneyê 

Sagir destnîşan kir ku Peymana Medîneyê ji bo maf û olan girîng e û got:"Pêxemberê me ev peyman hem bi bawermendan û hem jî bi bêbaweran re îmze kir. Wî got, 'Çi mafên min hebin, mafên we jî heman in. Çawa ku mafê min ê parastin, rêxistin û perwerdeyê heye, mafê we jî heye.' Ger ev peyman were bicîhanîn, jiyaneke hevpar wê were damezrandin. Lêbelê, ger neyê bicîhanîn, wê rewşeke pevçûnê ya domdar hebe. Her kes wê winda bike. Li cihê ku şer hebe, aştî û aborî tune. Birêz Ocalan her wiha behsa girîngiya vê peymanê kir. Divê azadiya fizîkî ya birêz Ocalan û mafê wî yê hêviyê tavilê were misogerkirin."

MA/FETHÎ BALAMAN