Parastina Rêbertî parastina azadiyê ye

• Endama Konseya Serokatiya Giştî ya KCK’ê Zilar Stêrk got: Baweriya gelê Kurd bi jiyana azad e. Hemû hevrêyên ku niha di tunelên berxwedanê de şer dikin, şopdarên Zîlan, Gulan û Semayê ne.

GULAN AVRÊL / BEHDÎNAN

Endama Konseya Serokatiya Giştî ya KCK’ê Zilar Stêrk beşdarî ‘Bernameya Taybet’ a Stêrk TV bû û bersiva pirsên Gulan Avrêl da. Zilar Stêrk anî ziman ku gelek pirsgirêkên gelê Kurd hene û got:“Ji aliyê neteweyî, hebûn, nasname, siyasî, leşkerî, civakî, rêxistinî, perwerde, zanist û kesayet ve pirsgirêkên me hene. Yê ku çareserî ji pirsgirêkên me re hilberand û ev çareserî pêş xist jî Rêber Apo ye. Eger Rêber Apo nebûya, weke gelê Kurd ê rû bi rûyê qirkirinê hatî, gelo me wê bikarîba dozeke wiha xurt pêş xistiba, ev mijara nîqaşê ye. Lewma Rêber Apo hate hedefgirtin. Dijmin di 6’ê Gulana 1996’an de li ber akademiya ku Rêbertî lê dimîne, wesayîteke bombebarkirî hate teqandin. Armanca vê êrîşê ew bû ku gelê Kurd bê lîder bihêlin. Nêrînên siyasî yên Rêbertî pir kûr in, dijminê xwe pir baş nas dike. Ev zanebûn, di pêşeng, kadro û milîtanên Tevgerê de jî çêbûbû. Bi saya tedbîrên Rêber Apo û Tevgerê, ev êriş vala hate derxistin.”

Bû xaleke werçerxê

Zilar Stêrk diyar kir ku şehîd Zîlan şervaneke du salan bû û got:“Heval Zîlan demek dirêj li çiyayan gerîlatî nekir. Lê keseke bi zane û welatparêz bû. Çalakiya heval Zîlan ne tenê leşkerî bû. Zîlan Heval bi zanebûn û îradeya ku ji Rêber Apo û Tevgera Azadiyê wergirtî, biryar da ku çalakiya fedayî bike. Di warê leşkerî de, çalakiyeke pir stratejîk e. Di şerê gerîla de taktîk û stratejiya demê diyar kir. Çalakiyeke pir pîroz û mezin bû. Ev çalakiya Heval Zîlan ji demê re bû bersiv. Çalakiya Heval Zîlan ji aliyê îdeolojîk, civakî, siyasî û têkoşîna jinê ve bû xaleke werçerxê ya pir mezin. Zîlanê konsepta dijmin ji her alî ve pûç kir. Heval Zîlan bi sekna xwe bandor li jin-mêr, her kesê kir. Bi hezaran ciwanên Kurd bûn şopdarê Zîlanê. Heval Sema Yuce li pey şopa heval Zîlan meşiya, li Girtîgeha Çanakkaleyê çalakiya xwe lidar dixe û di nameya xwe de dibêje, ‘Xweziya min jî çalakiyeke weke ya hevrê Zîlanê pêk anîba. Zîlan di çalakiya xwe de mirinê dikuje. 50 sal in em têkoşîneke hebûnê, nasname, çandî, siyasî, leşkerî, ekonomîk û civakî dimeşînin. Li Kurdistanê jiyan bi nirx bû. Bi saya Rêber Apo, bi saya Zîlan, Sema, Fîkrî Baygeldî, Leyla û hevrêyên din jiyan bi wate bû. Baweriya gelê Kurd êdî baweriya jiyana azad e. Hemû hevrêyên me yên ku niha di tunelên berxwedanê de şer dikin şopdarên Zîlan, Gulan û Semayê ne.”

Bila zarokên we mirinê têk bibin!

Endama Konseya Serokatiya Giştî ya KCK’ê Zilar Stêrk axaftina xwe wiha bi dawî kir: “Parastina Rêber Apo, parastina gelê Kurd e. Parastina Rêber Apo parastina jiyana azad e. Xwedî derketina li Rêber Apo, wezîfeyeke bingehîn e. Heval Zîlan di nameya xwe de; wezîfeya parastina gelê Kurd û Rêbertî dide me. Bi saya sîstem û paradîgmaya Rêber Apo li her devera cîhanê dost û hevrêyên Kurdan zêde bûne. Bi pêşengiya dostên me ji bo azadiya fîzîkî ya Rêber Apo gav tên avêtin. Divê di her warî de tevlîbûn ji vê pêngavê re çêbibe. Ji vir şûnde divê tevlîbûna ji pêngavê re hîn zêdetir bibe. Bihêlin bila zarokên we mirinê têk bibin, çima hûn ditirsin? Tevlîbûna jinên Kurd ji vê pêngavê re, pir girîng e.  Piranî jin vê pêngavê dimeşînin. Jin di asta navneteweyî de roleke pêşeng dilîzin. Ez ked û hewldanên wan silav dikim, lê jin divê reng û navê xwe xwe hîn zêdetir di pêngavê de diyar bikin. Divê dirûşmeyên xwe di asta xweser de zelal bikin, argumanên xwe ava bikin. Her wiha divê çalakiyên serbixwe jî pêş bixin. Ez dostên me yên ku ev pêngav pêş xistine, car din silav dikim. Ez bang dikim ku şêwazê pêngavê dewlemend bikin û çalakiyên bi bandor bidomînin.”