Ji bo vegotinê zend û bend badane
Şemî 17 Gulan 2025 - 03:25
Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) piştî “Banga Aştî û Civaka Demokratîk” a Rêber APO, li gelek bajaran dest bi serdana malbatan kirin û ev serdan hêj berdewam in. Li navçeya Geverê ya Colemêrgê jî heta niha li 12 tax û 72 gundan bi giştî serdana 5 hezar malbatan hatiye kirin. Di serdanan de belavokên têkildarî pêvajoya nû tên belavkirin û girîngiya pêvajoya nû tê vegotin. DBP û DEM Partiyî, di serdanan de li nêrîn û pêşniyarên welatiyan guhdarî dikin.
Xwe gihandin 20 hezar kesan
Hevserokê DEM Partiyê yê Geverê Ercan Sevmez, diyar kir ku ji 11’ê Nîsanê heta niha dest bi xebatên xwe kirine û xwe gihandine 20 hezar kesan. Sevmez, diyar kir ku banga Rêber APO di nava gel de rê li ber coş û kelecaneke mezin vekiriye û li gel hêviya aştiyê, fikarên gel jî hene. Sevmez, got ku sedema fikarên gel jî pêvajoya 2013-2015’an e û got:’’Dewletê tu gav neavêtine lewma gumanên gel hene. Di serdanan de me nameyên hevserokên me yên giştî jî dan gel.”
Bi zelalî tê vegotin
Bi domdarî Sevmez ev tişt anî ziman:“Di navbera 11 û 30’ê Nîsanê de em mal bi mal geriyan û me name bi xwe gihandin ber destê gel. Me bi hev re nîqaş kir û li nêrîn û pêşniyarên wan guhdarî kir. Me hewl da pêvajoyê bi zelalî jê re vebêjin. Gel, erênî nêz dibe. Ji bo civaka demokratîk û aştiyê divê mercên xebatê yên azad ên birêz Ocalan bên avakirin. Di serî de girtiyên nexweş, divê girtiyên siyasî bên berdan. Daxwaz heye ku Kurdî bibe zimanê fermî. Ji bo fikar û gumanên gel ji holê rabin, divê ev gav bi lez û bez bên avêtin.”
Divê dewlet gavan bavêje
Sevmez, da zanîn ku daxwaza gel ew e ku pêvajo li demeke dirêj neyê vehêlandin û got:“Divê dewlet û hikûmet gavên dilwêrek ên demokratîk biavêjin. Ji bo vê jî divê mercên muxatabê çareseriyê birêz Ocalan bên başkirin. Em xebatên xwe diyarî Sirri Sureyya Onder dikin. Soza me ji bo wan heye ku teqez aştiyê pêk bînin. Hêj gelek gund hene ku em biçin serdanê û bi sed hezaran kes hene em pê re biaxivin. Em dixwazin xwe bigihînin her kesî.”
MA/COLEMÊRG