Ji bo azadiyê berê xwe bidin Amara!

• KCK’ê diyar kir ku divê 4’ê Nîsanê li ser bingeha pêkanîna azadiya fîzkî ya Rêber Apo were pîrozkirin û bang li gel kir ku biçin Amarayê ku Rêber Apo lê jidayik bû.

Hevserokatiya Konseya Rêveber a KCK'ê bi wesîleya 4’ê Nîsanê rojbûna Rêber Apo daxuyaniyek da. KCK’ê destnîşan kir ku divê ji vê şûnde jî têkoşîn bi armanca pêkanîna azadiya fîzkî ya Rêber Apo û pêkanîna şert û mercên jiyana azad û xebata wî were pêşxistin. Berfirehiya daxuyaniya KCK’ê wiha ye:“Gelê Kurd 4’ê Nîsanê wekî rojbûna xwe dibîne û bi vê wateyê bi hezkirin, coş û minetdarî pîroz dike. Em jî vê roja watedar ku ji bo gelê me tê wateya zayîna nû, silav dikin û di serî de li Rêber Apo û gelê Kurd, li tevahî gelan, jin û dostan pîroz dikin.

Bêguman zayîna di 4’ê Nîsanê de, ji bo gelê Kurd bûye destpêka miladekî nû. Rêber Apo bi destpêkirina têkoşîna azadiyê hişt ku gelê Kurd ku rûbirûyê tunekirinê bû, ji nû ve rabe ser piyan, zane bibe, birêxistin bibe û ji bo azadiya xwe têbikoşe. Gelê Kurd bi vî awayî xwe ji her milî ve ji nû ve afirand. Bêguman wêrekiya têkoşînê ya ji bo azadiya gelekî ku hebûn, ziman û nasnameya wê hatiye înkarkirin, welatê wê hatiye parçekirin, bi komkujiyan ferzî bêdengiyekî dawî û mirinê hatiye kirin û biserxistina vê yekê, bi zehmetiyên mezin, hewldanên derasayî û bi hezkirin û girêdanbûna kûr a li gel, welat û azadiyê çêbûye. Bi îradeya ku wekî hewcedariya vê hezkirin û girêdanbûna kûr hatiye nîşandan, çêbûye. Gelê Kurd ji ber ku vê rastiyê pir baş dizane, hezkirinekî mezin nîşanî Rêber Apo dike. Zayîna Rêber Apo wekî zayîna xwe, hebûna wî jî wekî hebûna xwe dibîne. Bi vê hişmendî û hestên kûr 4’ê Nîsanê bi hezkirin û minetdarî pîroz dike.

Jin pêşengiya azadiyê dikin

Rêber Abdullah Ocalan ku bi derketina xwe geşedanên dîrokî afirand û ji aliyê gelê Kurd ve hezkirin û dilsoziyek mezin nîşanî tê kirin, kesayetekî ku divê ji nêz ve were fêmkirin e. Ji bo Rêber Apo helwesta li dijî neheqiyan û li dijî vê têkoşîn kirin, pir li pêş e. Mirov dikare bibêje ku ev cewhera kesayet û jiyana wî diafirîne. Yek ji aliyê wî yê ku herî zêde vê rastiyê nîşan dide, nêzîkatiya wî ya ji bo jinan e. Rêber Apo li hemberî zext û neheqiyên li dijî jinan, têkoşînekî mezin daye. Dîtiye ku hemû koletî, kedxwarî û neheqî li ser koletiya ku li ser jinê tê ferzkirin, pêş ketiye û têkoşîna azadiya Kurd di eksena azadiya jinê de pêş xist. Eleqe, dilsozî û hezkirina jinan bi taybet jî jinên Kurd ji bo Rêber Apo, ji vir tê. Ev rastî xwe di xwedîderketina li Rêber Apo û pêşengtiya ku jin pêş xistiye de dide der. Pîrozkirina 4’ê Nîsanê ji aliyê jinan ve bi coşekî mezin, bi rastiya ku 4’ê Nîsanê zayîna jina azad e re têkildar e.

Gerdûnîbûna Rêber APO

Bêguman yek ji nirxên sereke yên di karekterê Rêber Apo de, gerdûnîbûn e. Rêber Apo ji destpêkê ve Têkoşîna Azadiya Kurd bi nirxên gerdûnî yên mirovahiyê re girê daye û li ser bingeha sosyalîzm û xwişk-biratiya gelan pêş xistiye. Bi paradîgmaya xwe ya Neteweya Demokratîk û Modernîteya Demokratîk tevkariyekî dîrokî li têkoşîna azadiya gerdûnî ya mirovahiyê kir û bi vê têkoşînê re hatiye rewşa ku pêşengtiyê bike. Encama vê yekê ye ku eleqeya ji bo fikrên Rêber Apo gihîştiye asta gerdûnî û Pêngava Azadiyê ya Gerdûnî li ser vê bingehê mezin bûye û pêş ketiye. Hezên hegemonîk, herêmî û xwecihî yên modernîteya kapîtalîst bi hevkariyê xwe hewl dane bi Komploya Navneteweyî û dîlgirtina Îmraliyê re derketina dîrokî ya Rêber Apo rawestînin, lê bi komplo û dîlgirtinê re nekarîne pêşiya vê geşedana dîrokî bigirin. Rêber Apo bi pêşxistina tarzê berxwedanê ya bêhempa re, xiyanet û neheqiya dîrokî ya li ser wî hatiye ferz kirin, vala derxistiye. Bi Banga xwe ya Aşitî û Civaka Demokratîk re ku di 27’ê Şibatê de pêş xist, bergehekî nû li gelan û mirovahiyê qezenc kir û vê rastiyê careke din piştrast kir.

Berê xwe bidin Amarayê

Em careke din vê roja watedar pîroz dikin û bang li jinan, ciwanan, gelan, dostan û bi taybet gelê Kurd dikin ku 4’ê Nîsanê li her derê bi çandina daran bi coş pîroz bikin. Dîsa em bang li gelê xwe dikin ku di 4’ê Nîsanê de biçin Amarayê ku Rêber Apo lê jidayik bû. Divê dîlîtiya ku di şexsê Rêber Abdullah Ocalan de li gelê Kurd tê ferzkirin, bi dawî bibe. Gelê Kurd û dostên wan divê 4’ê Nîsanê li ser bingeha azadiya fîzîkî ya Rêber Abdullah Ocalan pîroz bike, divê ji vê şûnde jî têkoşînê bi armanca pêkanîna azadiya fîzkî ya Rêber Apo û pêkanîna şert û mercên jiyana azad û xebata wî pêş bixe. Azadiya Rêber Apo, azadiya gelê me, gelan û jinan e.”

BEHDÎNAN