Ji bo aştiyê konferans girîng bû

ROZA METÎNA / AMED

Eren Keskîn têkildarî Konferansa Aştî û Civaka Demokratîk a Navneteweyî da zanîn ji bo civakîbûna pêvajoya aştiyê ev konferans girîng bû û wiha got:"Pêvajoyeke nû ya aştiyê li herêma me dest pê kiriye. Ev pêvajoya tevahiya herêma Kurdan eleqedar dike, divê di nav civakê de were nîqaşkirin."

Partiya Wekhevî û Demokrasiyê ya Gelan (DEM Partî) di 6-7'ê Kanûnê de li Stenbolê “Konferansa Aştî û Civaka Demokratîk a Navneteweyî” bi beşdariya gelek rewşenbîrên navneteweyî li dar xistibû. DEM Partiyê piştre bi îmzeya beşdarên navneteweyî encamnameya konferansê weşand. Hevseroka Giştî ya Komeleya Mafê Mirovan (ÎHD) Eren Keskîn têkildarî “Konferansa Aştî û Civaka Demokratîk a Navneteweyî” nirxandin kir. Eren Keskîn wiha got:” Ez bawer dikim ev konferans dê bandora erênî li vê pêvajoyê bike. Ji ber encama konferansê ew e ku tevgera Kurd çiqas li ser aştiyê israr dike.”

Ji bo aştiyê konferans girîng bû 

Eren Keskîn da zanîn ji bo civakîbûna pêvajoya aştiyê ev konferans girîng bû û wiha got:"Pêvajoyeke nû ya aştiyê li herêma me dest pê kiriye. Ev pêvajo nêzîkî salekê ye didome. Girîngiya wê em pir baş dizanin pirsgirêka Kurd pirsgirêkek navneteweyî ye. Geşedanek li beşek ji vê erdnîgariyê tavilê bandorê li beşên din dike. Ne pêkan e ev pêvajoya nû ya li herêma me ji Rojava serbixwe were hesibandin. Ji ber vê yekê, ev pêvajoya tevahiya herêma Kurdan eleqedar dike, divê di nav civakê de were nîqaşkirin. Pêdivî ye pêvajo ji mirovan re baş were ravekirin û ev pêvajoya aştiyê divê civakî bibe. Ji ber vê yekê, ez bawer dikim ev konferans pir girîng e. Beşdarbûna konferansê pir zêde bû û ez difikirim beşdarbûn, nemaze ji derveyî Tirkiye û Kurdistanê, pir girîng e. Yek ji rêyên herî girîng ên bidestxistina aştiyê axaftin û ravekirin e û ji ber vê yekê ez vê konferansê pir girîng dibînim."

Rola Ocalan bû mijara sereke

Eren Keskîn bal bir ser peyamên konferansê û wiha pê de çû:"Di konferansê de girîngiya aştiyê hate teqezkirin û rola tevgera Kurd û Abdullah Ocalan di vê pêvajoya nû de bû mijara sereke. Siyasetmedar, rewşenbîr û nivîskarên ji derveyî Kurdistanê bi gelemperî diyar kirin ku tevgera Kurd di cîhanê de hêvî afirandiye û perspektîfa Ocalan divê bê guman were nîqaşkirin. Bi ya min, ev taybetmendiya diyarker a konferansê bû."

Peyama beşdarên biyan

Eren Keskîn li ser mijara peyamên kesên biyan ên tevli konferansê bûn jî wiha got:"Tiştê min di beşdarên ji derveyî welêt de dît ev e ku ew rastiya me ji hin beşên serjimara li vê herêmê dijîn çêtir fam dikin. Ev hem baş e û hem jî trajîk e. Wan xala tevgera Kurd gihîştiye, çalakiyên wê yên fedakar û potansiyela wê wekî çavkaniya hêviyê pir xweşik vegotin. Me li axaftinên kesên ku vê herêmê ji yên ku li vir dijîn çêtir nas dikin, guhdarî kir."

Konferansê bandorê li pêvajoyê bike

Eren Keskîn li ser bandora konferansê ev tişt anî ziman:"Ez bawer dikim ev konferans dê bandora erênî li vê pêvajoyê bike. Ji ber encama konferansê ew e ku tevgera Kurd çiqas li ser aştiyê israr dike. Wekî din, ez difikirim encamek din a girîng ew e ku tevgerên siyasî yên Kurd li seranserê herêma Kurdistanê bi hev re piştgiriyê didin vê pêvajoyê. Ev ji bo Kurdan pir girîng e û divê ji bo hemî dewletên bi Kurdan re pirsgirêkên wan hene jî girîng be. Ji ber vê yekê, divê ev encamên konferansê bi rêkûpêk werin nirxandin."

Mafê hêviyê pêdiviyek e

Eren Keskîn li ser mafê hêviyê jî wiha got:"Bangên Abdullah Ocalan ên derbarê mafê hêviyê de û bangên wî yên giştî, divê ji aliyê civakê ve werin berçavgirtin û em dizanin dewlet jixwe wan li ber çavan digire. Ji ber ku Ocalan niha ji aliyê dewletê ve wekî aktorekî tê qebûlkirin û ev qebûlkirin hatiye ragihandin. Ji ber vê yekê, ez bawer dikim ew kesên ku dewletê birêve dibin girîngiyê didin her peyvek ku ji devê Ocalan derdikeve. Dema li mafê hêviyê tê nihêrtin, divê ew qet wekî qenciyek ji aliyê Komara Tirkiyeyê ve neyê dîtin. Ew pêdiviyek e. Ji ber ku Komara Tirkiyeyê endamê Peymana Mafên Mirovan a Ewropayê ye û biryarên Dadgeha Mafên Mirovan a Ewropayê qebûl kiriye."

Peymanên navneteweyî binpê dike

Eren Keskîn li ser mijara nîqaşkirina pêwistiyên zagonî yên di konferansê de wiha nirxandin kir:"Pêwîstiya rêziknameyên zagonî û danîna wan a li ser bingehek destûrî ji destpêka konferansê ve hate nîqaşkirin. Ev yek pir girîng e ji ber ku pirsgirêka me ya bingehîn ew e ku Komara Tirkiyeyê dewletek hiqûqî nîne. Tirkiye her tim peymanên navneteweyî jî binpê dike. Ji ber vê yekê, daxwazek bi tevahî rewa ye ku hemî daxwazên aliyê Kurd bi destûrî werin garantîkirin."