Îran rastbêjiyê dadgeh dike

Rojnamevan Nîlûfer Hamedî û Elaha Muhemmedî, di Îlona par de nûçeya kuştina jina Kurd Jîna Amînî ragihandibûn. Rejîma Îranê, niha vî karê ragihandina heqîqetê dadgeh dike.

Rojnamevan Nîlûfer Hamedî yekemîn kes e ku nûçeya Jîna Amînî ya di 16’ê Îlona 2022’yan de li Îran û Rojhilatê Kurdistanê ji aliyê ‘polêsên hîcabê’ ve hat qetilkirin, ragihand. Û Elaha Muhemmedî jî di merasîma cenazeyê de dirûşma “Jin jiyan azadî” li cîhanê ragihand. Her du jî ev bû 9 meh ku di hepsê de ne û hîna nû doh dadgehkirina wan dest pê kir.

Yekemîn rûniştina doza nûçegihana rojnameya Hamamîhan Elaha Muhemmedî roja 29’ê Gulanê li Şaxa 15’ab a Dadgeha Şoreşê yê bi serokatiya Ebûlqasem Selavatî hat dîtin. Dema li dadgehê parêzera rojnamevan amade bû, rûniştin li çapemeniyê girtî bi rê ve çû. Parêzera rojnamevanê, Şahab Mîrlohî rûniştina pêşî “erênî” nirxand, û got, roja rûniştina din nehatiye diyarkirin.

Yekemîn rûniştina doza nûçegihana Rojnameya Şerq, Nîlûfer Hamedî ya piştî girtina 9 mehan tê dadgehkirin. Ew jî li heman şaxê Dadgeha Şoreşê ya Tehranê bi rê ve diçe.

Rojnamevan Mîna Akberî li ser medyaya dîjîtal ragihand ku gelek rojnamevan û aktîvîstên sivîl bi malbata Elaha Muhemmedî re li ber avahiya edliyeya li cadeya Muelem a Tehranê kom bûne. Di parvekirinê de hat gotin, “Xwedawend di saet 09.40’an de bi wesayiteke cama reş anîn, lê destûr nedan ku kes nêzî wesayîte bibe.”

Her du rojnamevan di 8’ê Mijdara 2022´yan de bi propagandaya li dijî dewletê û komploya li dijî ewlehiya neteweyî hatin sûcdarkirin. Ev sûcdarkirinên keyfî dikarin bibin sedema cezayê bidarvekirinê. TEHRAN