Heta azadiya Rojava em ê têbikoşin

Rêveberên DEM Partiyê ku banga heta ku gefên li dijî Rojavayê bidomin dê bi ruhê yekîtî û hevgirtinê ji bo Rojavayê têbikoşin, daxwaza vekirina Deriyê Sînor ê Murşîtpinarê kirin da ku alîkarî bigihîje Kobanê.

Tirkiyeyê ligel Heyet Tehrîr El Şam (HTŞ) û komên girêdayî DAIŞ'ê, di 6'ê Çileyê de êrişî Helebê kir. Ev êriş, paşê li seranserê Rojavayê belav bûn û jiyana li wir hedef girtin. Tevî van êrişan jî, berxwedana li Rojavayê berdewam kir û di encama seferberiya Kurdan û hevalbendên wan ên li çaraliyê cîhanê de, di 30'yê Çileyê de di navbera Hêzên Demokratîk ên Sûriyeyê (HSD) û hikûmeta Şamê de peymanek hat îmzekirin.

Rêberên Partiya Wekhevî û Demokrasiyê ya Gelan (DEM Partî) li parêzgehên Balikesir, Manisa û Muglayê li ser bûyeran axivîn û daxwaza berdewamiya hevgirtinê kirin.

Rêveberê Rêxistina DEM Partiyê yê Balikesîrê Nihat Baran, bi bîr xist ku pêvajoyeke girîng di rê de ye û got ku ji bo Kurdan şerê man-nemanê tê meşandin. Nihat  Baran diyar kir ku Kurd di vê pêvajoyê de bi yekîtiyê hevgirtin nîşan dane û got: "Em dixwazin pêşî li serdestbûna xerabiyê bigirin. Kurdan jiyaneke nû afirandine û di vê jiyanê de koletî tune ye, tenê yekîtî heye. Kurdan xwişk û biratiya gelan nîşanî cîhanê dan. Rojava ji bo Kurdan meseleya man û nemanê ye. Îro sînorên çêkirî di bin lingên ciwanên Kurd de hatine şikandin. Di sedsala 21'ê de Kurd dixwazin bibin xwedî statu. Zimanê xwe dixwazin. Kurd dixwazin bi dîrok, ziman û çanda xwe di cîhanê de derkevin pêş. Bijî berxwedana Rojava!"  

Hevserokên DEM Partiyê yên Manîsayê Evîn Gunsel û Kerem Taylan, berxwedana Rojavayê silav kirin û gotin: "Li Rojavayê jiyaneke nû bi pêşengiya jinan hatiye avakirin. Lê îro, em dibînin ku zîhniyet û hêzên tarî êrişî jinan dikin û wan dikujin. Em daxwaza rakirina dorpêça li ser Kobanê dikin. Divê hemû gelê me bibe yek û bibe dengek ji bo Rojavayê. Ger Rojava bikeve, hemû Kurd jî wê bikevin. Ew dixwazin destkeftiyên ku Kurdan bi bedelên mezin bi dest xistine, bi destên HTŞ'ê ji holê rakin. Çar perçeyên Kurdistanê bûne yek. Em bang li hikûmeta Tirkiyeyê dikin; dev ji dijminatiya bi Kurdan re berde. Deriyê Sînor ê Murşîtpinarê vekin da ku alîkarî bigihîje Kobanê."

Hevserokên DEM Partiyê yên Mûglayê Zuhal Macit û Mehmet Kaya jî bi bîr xistin ku êrişên ku di 6'ê Çileyê de li Helebê dest pê kirin, îro jî bi dorpêçkirina Kobanê berdewam dikin. Zuhal Macit destnîşan kir ku Rojava ji bo Kurdan xeta sor e û got: "Rojava ew cih e ku berxwedana herî xurt li dijî çeteyên DAIŞ'ê tê kirin. Ne tenê erdnîgarî ye, ew cihê ku jiyaneke nû tê avakirin e. Ew cihê ku felsefeya 'Jin, jiyan, azadî' lê tê jiyîn. Ew dorpêçkirinek e ku ji hêla hemû hêzên navneteweyî ve tê kirin da ku rê li ber statuyek ji bo Kurdan bigirin. Em vê yekê qebûl nakin. Em ê heta ku Rojava azad bibe têbikoşin. Rojava wijdan, azadî, berxwedan û xeta me ya sor e. Bijî berxwedana Rojava!"

MA / ÎZMÎR