Hêndêk boçûn le ser kitêbî Sazmanî Inqîlabî u Kurdistan (211)

Dilêr Akreyî

5-î Fêwrîyey 2021

Kitêbeke çîrokî ezmûnêkî nwê le ser gorepanî siyasî Kurdistan degêrêtewe ke le kotayî salanî şestekanî sedey bîstem ser heldedat.

Hewênî çîrokekeş lewêwe dest pêdekat ke desteyek le endamanî Hîzbî Tûdey Iranî le Ewropa le hîzbekeyan cwê debnewe û rêkixrawêk be nawî Sazmanî Înqîlabî dademezrênin.

Endamanî rêkxiraweke bo xo amadekirdin le buwarî siyasî û aydolojî û serbazîyewe rû le Çîn û Kûba deken. Duway geraneweyan bîr le berpakirdinî şorşêkî hawşêwey şorişî Çîn le Iran deken û degene ew birwayey ke Rojhelatî Kurdistan baştirîn şwêne bo destpêkirdinî şorşekeyan.

Her lew serubende da grûpêkî rûnakbîr û şorişgêrî Kurd le Rojhelatî Kurdistanîş le Hîzbî Dêmokratî Kurdistanî Iran ciya debnewe û komîteyek dademezrênin be nawî Komîtey Şorişgêr û amadekarî bo xebatî çekdarî lew beşey kurdistan deken.

Siyasetmedarî roşinbîr û be ezmûn Celal Talebanî-ş debête pirdî peywendî nêwan Sazmanî Înqîlabî û Komîtey Şorişgêr ke ew serdeme serokî balî mektebî siyasî Partî Dêmokratî Kurdistanî Iraq bû ke duway ciyabûnewey le balî Mela Mistefa Barzanî, binke û baregakanî le Bekrewcoy Silêmanî danabû.

Serokî Sazmanî Înqîlabî bo aşanbûn legel doxî ewsay Rojhelatî Kurdistan serdanî Başurî Kurdistan dekat û lewêwe peywendî legel serkirdekanî Komîtey Şorişgêr dademezrênê û bo maweyek le gelyan dekewê.

Le geraneweyda bo Ewropa raportêk sebaret be ra boçûnî xoy bo Sazmanî Înqîlabî amade dekat û sazmanekeş biryar dedat ke grûpêk le endamanî xoy binêrête Rojhelatî Kurdistan û zemîney guncaw bo şorişe çaweruwankiraweke amade biken.

Ew katey ke grûpeke berew Kurdistan berê dekewê, hewalî şehîdkirdinî zorbey serkirdekanî Komîtey Şorişgêrî Hîzbî Dêmokratî Kurdistan-yan pêdegat,belam paşgez nabnewe û xoyan degeyenne baregay serekî Celal Talebanî le Bekreco.

Maweyek le Silêmanî û Helebce demênnewe û dest be perwerdey siyasî û aydolojî û meşqî serbazî be paşmawey pêşmergekanî Komîtey şorişgêrî HDK û layengiranî balî mektebî siyasî PDK deken. Wêray emeş ew pizîşkaneyşî ke le naw girûpekeda bûn, le Helebce xizmetî tendrûstîyan pêşkeş be xelk û pêşmerge û xêzanekanyan dekrid.

Paş maweyek biryar dedrê ke endamanî sazmaneke bo dirêjedan be xebat û têkoşanekeyan,be nihênî biçnewe naw Iran û jimareyekyan em erkeyan becê geyand, belam ber lewey nexşekeyan encamgîr bêt, le layen dezgay Sawakewe şkestî pê dehênrê xobedestewe dan û  rûberûbûnewey çekdarî, girtin,kuştin,  eşkencekirdin û le sêdaredanî lê dekewêtewe.

Bem şêweye karwanî ew şorişgêraney be awatêkî gewrewe kewtbûwe rê û xulyay berpakirdinî şorişêkî nwê bûn ke le gundewe hengaw berew gemarodanî şarekan helhênin û birew be rewtî Mao tsêtong le Kurdistan û Iran biden, le layen dezga serkutkerekanî rijêmî Şa û xofiroş û nokeranî rijêmekewe xinkêndira.Egerçî ew şorişgêrane neyantuwanî encamêkî ewto bedest bênin,belam duwatir towî hizreke le Başûrî Kurdistan neşunimay kird û berî girt.

Serguzeştî em karwane ke seretay hawkarî kirdinêkî dilsozaney çep ajoy Iranyekan û Kurdekan nîşan dedat ke dekra bibête seretay qonaxêkî nwê bo Kurdistan û dewletanî nawçeke??!!

Kitêbeke be şêwezarawey şîrînî Mukiryan nûrsawe ke pişt be gêranewey bikere serekyekanî ezmûneke debestê ke nûser Hemîd Şewket be şêwey çawpêkewtin tomar û çapî kirdûn. Le pal eweşda kak Hesen Qazî zor be lêzanane têbînî û serincî ew kesaneşî xistûte palyanewe ke le nizîkewe peywendyan be girûpekewe hebûwe yan ew kesaney ke be şêweyekî rastewxo yan narastewxo aşnayî û agadarîyan le karûbarî beşêk le endamanî Sazmanî Înqîlabî hebûwe.

Wêray emaneş be jimareyek send û belge û wêne kitêbeke razandûwetewe. Boye deşê em kitêbe wekû serçaweyekî mitmane pêkiraw çawî lê bikrê be taybetî lay ewaney ke xwazyarin le barey em rewte nwêye şorişgêrîyey le Iran û Başur u Rojhelatî Kurdistan bikolnewe û tîşik bixene ser ho û hokar û helumerc û barudoxe nêwxoyî û nawçeyî û nêw dewletyekan sebaret be le barbirdinî hewlêkîlew corewe.

Bo minêk ke zanyaryekî ewtom le ser bizawtî fîkrî Mao tsêtong le Başur û Rojhelatî Kurdistan nebûwe, jêderêkî bekelk bûwe û zanyarîyekî zorim lê helçinî.

Hawkat demewê çend pêşnyar û têbîynîyekîş bo rêzdar Hesen Qazî bikem le barey:

1/perawêzekan lay xuwarewey laperekan dabinrê pêm baştire, çunke hebûnyan le naw deqî nûsînekanda be taybetî eger dirêj bin şîrazey bîrkirdnewey xwêner depiçrênê. Her weha pêwîstî be dûbare nûsînewey wuşey amadekarîş nabê, eger her le seretay kitêbekewe amaje bewe bikrê ke perawêzekan birîtîn le serinc û têbînyekanî amadekarî kitêbeke. Ew kate tenya be dananî nîşaneyek, hêmayek yan jimareyek deşê serinc bo perawêzekan rabikêrşê.

2/Bo çapî duwemî kitêbeke pêm başe be çawêkî tîjtir seyrî rênûsî kitêbeke bikrêtewe, çunke hendêk le pîtekan le katî çapda derperîwn yan gordirawin.

3/ Le laperey 56-î kitêbekeda em pende 'Erebye hatûwe"liqme elsêbah mismar alrekeb"ke le deqe Farsyeke wergîrawe, belam pendeke lay 'Erebekan zor bawe û bem şêweye dewutrê : " luqmehû elsebahî mîsmarulbeden" ke Kurdîyekey dekate " berça bizmarî cesteye" ke be boçûnî hendê kes pendeke fermûdeyêkî pêxemberî îsalme.

Le kotayîda ew rence zorey ke amadekarî kitêbeke dawyetî cêgay rêzlênan û destxoşî û pîrozkirdne.xerman bereket.

Dirêjey heye…