Em bi êrişan naqedin

Jinên bajarê Kobanê ku li hember komkujiya dewleta Tirk a li Berxbotanê nerazîbûn nîşan dan gotin:"Dixwazin ku qirkirina gelê Kurd bi riya van komkujiyan bikin. Lê ez dibêjim em hene û em ê her tim hebin."

Dewleta Tirk pêr bişev gundê Berxbotanê yê li Başûrê Kobanê bi çekên giran û obûsan bombebaran kir. Di encama êrîşê de komkujî pêk hat. Ji heman malbatê dayik Xezal û bav Osman û zarokên wan Ahîn, Dîcle, Dilovan, Fewaz, Salih, Yasîr û Avesta hatin qetilkirin û Ronahî û Narîn bi giranî birîndar bûn. Li dijî bûyerê jinên ji bajarê Kobanê helwesta xwe parve kirin.

Zarokan qetil dikin

Semîra Mistefa êrîşên dewleta Tirk ên bê navber dewam dikin şermezar kir û wiha got: "Gelê Kurd her tim di komkujiyan re derbas dibe. Her tim gelê Kurd di nav zor û zehmetiyan de ye, di nav êrîşan re derbas dibe. Mîna ku li gundê Bexbotanê yê girêdayî bajarê Kobanê li ser gelê sivîl komkujiyek hat kirin. Di komkujiya ji aliyê dewleta Tirk a dagirker ve hat kirin de mala sivîlan kirin hedefa xwe. Dewleta Tirk zarokan qetil dike. Em dikarin bibînin ku hedef girtina Bendava Tişrînê, av û ceyrana gel e. Komkujiyê li ser gel dike, her tiştî bi Kurdan dike. Kurdan dike hedefa xwe. Bakur û Rojhilatê Sûriyeyê her tim di bin êrîşan de ye.”

Em bi êrişan naqedin 

Fatma Xelîl anî ziman ku dewleta Tirk dixwaze bi van komkujiyan qirkirina Kurdan pêk bîne û wiha got: “Em bêdengiya van dewletan şermezar dikin. Yekser dewletên ku dengê xwe ji van êrîşan û komkujiyan re nakin, em şermezar dikin. Dixwazin ku qirkirina gelê Kurd bi riya van komkujiyan bikin. Lê ez dibêjim em hene û em ê her tim hebin. Ji ber ku em ji van komkujiyan ne dûr in. Li Bakur û Rojhilatê Sûriyeyê her tim ev komkujî hene û heta niha jî heye. Em dikarin bêjin dewleta Tirk ji lênûsa mirovahiyê derketiye, ma wiha mirovahî ye? Ma vê malbatê çi kiriye? Malbat hatiye ser karê xwe, dewleta Tirk komkujî li ser wan pêk anî û 9 kesan jiyana xwe ji dest da, 2 keç jî birîndar in.”

NÛJINHA/KOBANÊ/ÊLVÎN MIHEMED