Divê komisyon li Ocalan guhdar bike

Hevserokê Giştî yê ÎHD’ê Huseyîn Kuçukbalaban ku tevlî civîna komîsyona li meclîsê bû, anî ziman ku li komîsyonê gelek kêmasî hene û di serî de Rêber Apo divê komîsyon li aktorên meseleyê hemûyan guhdarî bike.

Komeleya Mafên Mirovan (ÎHD) ku yek ji saziyên beşdarî civîna pêncemîn a Komîsyona li Meclîsê bû, pêniyarek ji 11 xalan pêşkêşî komîsyonê kir. Hevserokê ÎHD’ê Huseyîn Kuçukbalaban têkildarî mijarê  axivî.

Huseyîn Kuçukbalaban anî ziman ku yek ji gavên bingehîn ên çareseriya meseleya Kurd mijara bikaranîna Kurdî li qada cemaweriyê ye û diyar kir ku di rewşeke welê de ku zext li ser Kurdî heye, cihê matmayinê ye ku daxwaza Dayikên Aştiyê ya axaftina bi Kurdî ya li komîsyonê hate redkirin. Kuçukbalaban ragihand ku vê rewşê hêz û hêviya çareseriyê ya komîsyonê lawaz kiriye û got, “Meseleya Kurdî ji xwe yek ji gavên bingehîn ê çareseriyê ye ku divê di meseleya Kurd de bê avêtin.”

Kuçukbalaban anî ziman ku ew şahid û ‘bersûc’ê 39 salan ê şer e û bal kişand ser girîngiya vexwendina wan a li komîsyonê. Kuçukbalaban her wiha destnîşan kir ku ji ber komîsyon li nava çarçoveyeke qanûnî nehatiye bicihkirin, rîskeke mezin heye û bi bîr xist ku di pêvajoyên çareseriyê yên dema bihurî de li gel sererastkirinên qanûnî jî siyasetmedar hatin darizandin, lewma di rewşa heyî de hem parlamenter hem jî nûnerên rêxistinên civakî yên sivîl dibe ku paşerojê bi rîska hiqûqî re rû bi rû bimînin.

Hevserokê Giştî yê ÎHD’ê Huseyîn Kuçukbalaban bal kişand ser şêwe û dema karkirinê ya komîsyonê û got, hewldana komîsyonê ya ku dixwaze şerê 40 salên dawî û meseleyeke tevlîhev a 100 salî di nava şeş mehan de çareser bike, nêzîkatiyeke bi kêmasî ye. Kuçukbalaban destnîşan kir ku di serî de Rêberê Gelê Kurd Abdullah Ocalan divê komîsyon li aktorên meseleyê hemûyan guhdarî bike û got, “Komîsyonê heta niha pênc civîn lidar xist. Lê belê yek ji tiştên ku diviyabû beriya civînan bikira ev bû: Birêz Abdullah Ocalan yek ji aktorên krîtîk ên vê pêvajoyê ye û gavên krîtîk ên ji 1’ê Cotmehê û vir ve têne avêtin, bi banga Birêz Abdullah Ocalan hatin avêtin. Lê belê komîsyonê heta niha ji xwe re nekiriye kar ku li Birêz Abdullah Ocalan guhdarî bike. Halbûkî ew yek ji aliyên herî krîtîk e û diviyabû pê re hevdîtin bihata kirin. Piştre bi civaka sivîl û gel re hevdîtin dikarîbû bihata kirin; lê belê ev nehate kirin. Me ji xwe ev yek pêşniyar kir û li gorî me ev rewş yek ji kêmasiyên komîsyonê ye.”

ANF/NAVENDA NÛÇEYAN