Divê hevpeymana civakî esas bê girtin

Endama Koordînasyona Meclîsa Jinan a Bakur Rojhilatê Sûriyeyê Ebîr Hisaf, da zanîn divê hevpeymana civakî esas bê girtin û got:"Peymana civakî, ji bo hemû hevgirtiyên li herêma me, derfeta rastîn a jiyana azad e. Ji ber vê yekê divê em peymanê biparêzin û pêk bînin."

Li Bakur Rojhilatê Sûriyeyê peymana civakî piştî du salên xebatê 12’ê Kanûna 2023’yan hat pejirandin. Di ve pêvajoyê de saziyên civaka sivîl, partiyên siyasî û tevgerên jinan jî cih girtin. Armanc ew bû ku civakek demokratîk a ji mafên mirovan re rêzê nîşan dide û di her warî de rola jinan bi hêz dike were avakirin.

Ji ala 2011’an pê ve bi guherînên siyasî û civakî yên li Sûriyeyê hatin jiyîn re, Rêveberiya Xweser a li Bakur Rojhilatê Sûriyeyê, bi tecrubeya xwe ya ku modeleke cuda bû derket pêş. Peymana civakî bû yek ji hîmên bingehîn ên Rêveberiya Xweser.

Parastina destkeftiyan peywira me ye

Ebîr Hisaf, li ser girîngiya pergaleke demokratîk nirxandinên xwe wiha domand: “Em daxwaza Sûriyeya ku cudahiyan dihewîne, piranîparêz û nenavendî dikin. Em ji muzakere û çareseriya siyasî û aştiyane re amade ne. Hikumeta demkî ya ku berê ev fikir red dikir jî êdî helwesta xwe diguherîne. Peymana 10’ê Adarê di mijara hevgirtiyên herêmê de zelal e. Muzakere hê jî didomin û armanca makezagoneke demokratîk û adil e. Peymana civakî, ji bo hemû hevgirtiyên li herêma me, derfeta rastîn a jiyana azad e. Ji ber vê yekê divê em peymanê biparêzin û pêk bînin. Dema ku bi herêmên din ên Sûriyeyê re tê muqayesekirin, tê dîtin ku ev der navenda ewlehî û aramiyê ye, ji bo bi deh hezaran Sûriyeyiyan bûye stargeh. Parastina van destkeftiyan peywira me ye.”

NÛJINHA / QAMIŞLO / ŞÊRÎN MIHEMED