Bi Ocalan re hevdîtin divê

Cigirê Hevserokên Giştî yê DEM Partiyê Mehmet Rustu Tiryakî diyar kir ku hêvî û baweriya wan heye ku komîsyon bi Rêberê Gelê Kurd Abdullah Ocalan re hevdîtinê pêk bîne û got divê hinek qanûn bên guhertin.

Li Meclîsa Mezin a Tirkiyeyê (TBMM) di çerçoveya pêvajoya Aştî û Civaka Demokratîk de Komîsyona Demokrasî, Xwîşk-Biratî û Hevgirtina Mîllî hat avakirin. Komîsyon bi beşdarbûna 51 endamên partiyên siyasî xebatên xwe didomîne. Komîsyonê heta niha 5 civîn li darxist û vê hefteyê jî wê civîna 6 û 7'an li darbixe. Civîna komîsyonê ya 6'em roja çarşemê seat di 14:00'an de bi guhdarkirina Serokê Yekîtiya Baroyên Tirkiyeyê û serokên baroyên Enqere, Çewlîg, Amed, Hatay, Stenbol, Meletî, Mêrdîn, Mersîn, Wan û Sêwasê berdewam bike. Komîsyon dê civîna xwe ya 7'emîn jî pêncşemê seat di 11:00'an de li darbixe û di civînê de serokên berê yên meclisê bên guhdarkirin.

Cîgirê Hevserokên Giştî yê Partiya Wekhevî û Demokrasiyê ya Gelan (DEM Partî) Mehmet Rustu Tîryakî têkildarî xebatên komîsyonê û pêvajoyê  axivî.

Tevlêbûna partiyan hêzê mezin dike

Mehmet Rustu Tîryakî bi lêv kir ku bi avabûna komîsyonê re pêvajo derbasî merhaleyeke fermî bû û ev tişt gotin: “Ew pêvajo ji aliyê dewletê û tevgera Kurd ve dimeşiya. Piştî avabûna komîsyonê êdî pêvajo fermî bûye. Ji ber wê jî avabûna komîsyonê girîng e. Di komîsyonê de jî ji bilî partiyekê hemû partî tevli komîsyonê bûn. Tevlêbûna partiyan hêza komîsyonê mezin dike.”

Bi Ocalan re hevdîtin divê

Mehmet Rustu Tîryakî diyar kir ku hêvî û baweriya wan heye ku komîsyon bi Rêberê Gelê Kurd Abdullah Ocalan re hevdîtinê pêk bîne û wiha dirêjî da axaftina xwe: “Divê ev komîsyon bi birêz Abdullah Ocalan re hevdîtinê bike. Di hevdîtinê de jî hemû partiyên ku di komîsyonê de ne cih bigrin. Yanî bêjin bila DEM Partî tenê biçe ew jî ne rast e. Heke ew komîsyon neçe Îmraliyê û bi birêz Abdullah Ocalan re hevdîtinê pêk neyne xebata komîsyonê wê kêm bimîne.”

Divê di mekazagonê de bi cih were

Mehmet Rustu Tiryakî li ser xebatên komîsyonê jî destnîşan kir ku komîsyon piştî civînan wê pêşniyarên qanûnan bibe parlamentoyê û wiha got: “Ew komîsyon nikare qanûnan derxe û mekazagonê biguherîne, tenê dikare pêşniyaran bigre û wan pêşniyaran di parlamentoyê de bike qanûn. Divê hinek qanûn bên guhertin. Yanê dema PKK'ê dev ji çekan berda bi hezaran şervan hene rewşa wan dê çi bibe. Bi hezaran kes di girtîgehê de ne rewşa wan dê çi bibe. Ji ber ku derheqê wan de doz hatinê vekirin bi sed hezaran kes li derveyî welat in, rewşa wan dê çi bibe. Heke pirsgirêk û provakasyon dernekevin em di wê baweriyê de ne ev komîsyon dê rola xwe pêk bîne.”

Di dawiya axaftina xwe de jî Mehmet Rustu Tîryakî bal kişand ser aloziyên li Sûriyeyê û got divê Tirkiye destê xwişk û biratiyê bide Rojava.

AW/ENQERE/MAHMÛT ALTINTAŞ