Şêra Qahîrê çû ber dilovaniya xwedê

Nivîskar Nawal El Seadawî ya ku li nav welatên Ereban, yek ji pêşenga têkoşîna azadiyê ya jinan bû, di 90 saliya xwe de wefat kir. 

Rojnameya dewletê El-Ahramê diyar kir ku El- Seadawî 21’ê Adarê wefat kiriye.

Seadawî ya ku pirtûkên wê yên femînîst ên bi navê ‘Berê jin hebû’ û ‘Jin û zayendî’ referansên xurt in, demeke dirêj li nav welatên Ereban ji bo mafên jinan û li dijî baviksalariyê têkoşîneke xurt meşand.

Nawal El-Seadawî di 50 berhemên xwe de qala pirhevjînî, sergirtin, bêedaletiya mafê mîrateyê ya di navbera jin û mêran de û sineta jinan dikir û nerazîbûn nîşanî van tiştan dida.

Pirtûka Seadawî ya bi navê ‘Jin û zayendî’ sala 1972’an derketibû. Seadawî di vê pirtûka xwe de qala sinetkirina jinan dikir. Pirtûk berê hate qedexekirin û piştre nivîskar neçar ma ku dev ji karê xwe yê bijîşkiyê berde.

Ji ber gefên Îslamîstan, Nawal El-Seadawî neçar ma ku sala 1993’yan ji Misirê derkeve û sirgunî DYE’yê bû. Di sala 2005’an de dema ku vegeriya Misrê, bû berendama serokkomariyê lê bi sedema ku hêzên ewlekariyê mîtîngên wê asteng kirin, wê dev ji berendamtiyê berda. 

QAHÎRE