Rewşa li Tirkiyeyê rojeva PE’yê ye

Zextên siyasî û paşveçûna demokratîk a li Tirkiyeyê di rûniştina giştî ya Parlamentoya Ewropayê (PE) ya li Strasbourgê de hatin nîqaşkirin. Komên cuda yên siyasî rexneyên tund li ser dûrxistina şaredarên hilbijartî, zextên li ser rojnamegeran û binpêkirinên mafên mirovan ên li Tirkiyeyê kirin.

Em bi muxalefetê re ne

Seroka Koma Sosyalîst û Demokrat (S&D) Iratxe Garcia Perez di civîna çapemeniyê de axivî û diyar kir ku piştî hilbijartinên 14’ê Gulanê yên li Tirkiyeyê herî kêm 14 şaredarî hatine desteserkirin. Iratxe García Perez wiha bersiv da pirsa ‘Bandora Parlamentoya Ewropayê li ser vê mijarê çi ye?’ :“Me hefteya borî bi eşkerehî piştgirîya xwe ji bo şaredarên ku wek Ekrem Îmamoglu derqanûnî hedef hatin girtin, anî ziman.”
Iratxe Garcia Perez anî ziman ku Partiya Sosyalîstên Ewropayê (PES) bi CHP’ê re di nava tevkariyê de ye û da zanîn ku PES wê beşdarî kongreya CHP’ê bibe. Iratxe Garcia Perez bi bîr xist ku ew bi tevgera siyasî ya Kurd re di nava têkiliyê de ne û peyama “Em ji bo serweriya hiqûqê û parastina azadiyan helwesteke zelal nîşan didin” da.

Divê dawî li zextan bînin

Seroka Koma Liberal Renew Europe Valérie Hayer têkildarî pirsa ku li Tirkiyeyê di nava 10 mehên dawî de 14 hevşaredar ji erk hatin dûrxistin û zextên li ser rojnamevanan ev bersiv da: “Kesên hatin hilbijartin ji erk dûrxistin û hewldana bêdengkirina rojnamevanan nayê qebûlkirin. Divê rayedarên Tirk dawî li van pêkanînên dij demokratîk bînin. Em ê wekî YE’yê ji bo parastina demokrasiyê hemû alavên xwe bikarbînin.”

Durûtiya YE’yê nayê qebûl kirin

Hevserokên Koma Çep (The Left) Manon Aubry û Martin Schirdewan têkildarî rewşa li Tirkiyeyê daxuyaniyên bandorker kirin. Aubry wiha bersiv da pirsa, ‘Peyama YE’yê wê li dijî ji erk dûrxistina hevşaredaran û li hemberî binpêkirinên mafên mirovan çi be?:“Em piştgiriya tam didin têkoşîna gelê Tirk a li dijî rêveberiya otokratîk. Lê feraseta YE’yê ya ‘Çavê xwe li binpêkirinên mafên mirovan bigre, koçberan asteng bike’ hîpokrasî ye. Êdî dem hatiye ku helwestekî rast nîşan bidin.”

Hevseroka Koma Keskan/Efa Terry Reintke jî geşedanên li Tirkiyeyê nirxand. Terry Reintke li ser pirsa têkildarî rojnamevanên Kurd wiha got:“Em girtina Ekrem Îmamoglû bi tundî şermezar dikin. Lê ev tenê mînakek e; li Tirkiyeyê demokrasî jixwe di rewşekî zehmet de bû û niha ber bi rejîmekî otokratîk ve diçe. Komîsyona YE’yê di vê mijarê de gelek bêdeng ma.”

ANF/STRASBOURG