PKK ji bo azadiyê têdikoşe

• Gerîlayan salvegera damezrandina PKK'ê pîroz kirin û anî ziman ku PKK dîrokeke berxwedanê ye, ji bo azadiya hemû gelan têkoşiya ye.

Partiya Karkerên Kurdistan (PKK) di 27’ê Mijdara 1978’an de li gundê Fîsê ya navçeya Licê ya Amedê, bi pêşengiya Rêber Apo û bi tevlîbûna 22 kadroyan hate avakirin. Ji wê rojê heta roja me ye îro, Partiya Karkerên Kurdistanê bû xwedî mîrateyek bêhempa. Ji wan mirateyan yek jî mirateya hebûn, çand û nasnameya Kurd e ku bi berdelên giranbûha hate misogerkirin.

Avabûna tevgera PKK’ê ji bo gelê Kurd mîladek û vejînek e. Salvegera vê vejînê heta roja me yê îro her dem bi têkoşîn û berxwedanî tê pîrozkirin. Gerîlayên azadiya Kurdistanê jî li qadên çiya pêşengiya vê vejînê dikin û azadiyê ji bo gelan misoger dikin. Bi boneya vê rojê gerîlayên HPG’ê der barê salvegera damezrandina PKK’ê de nêrînên xwe parve kirin.

Gerîlayê enternasyonal Mazlûm Dogan ku bi eslê xwe Ereb e, diyar kir ku bi PKK’ê re vejîn pêk hat û got niha jî Neteweya Demokratîk ava dibe. Mazlûm Dogan got, “Di serî de dixwazim wateya vê rojê bînim ziman. Wekî her kesek jî dizane 27’ê Mijdarê, roja avabûna Partiya Karkerên Kurdistanê ye. Bingeha ku ev partî li ser hatiye avakirin, rizgariya gelê Kurd e. Heman demê Rêber Apo ji bo bîranîna şehadeta hevrê Hakî Karer biryara avabûna partiye da. Ji ber wê jî PKK’ê giyana şehîd Hakî Karer e."

Mazlûm Dogan, diyar kir ku çavkaniya vê berxwedanê ramanên Rêber Apo ye û berxwedana Mazlûm Dogan a li zindana Amedê û çalakiya fedaî ya şehîd Zîlan bibîr xist. Gerîla Mazlûm Dogan, destnîşan kir ku PKK’ê hêza xwe ji fikra azadiyê û baweriya ji xwişk-biratiya gelan digire û wiha dewam kir, “Partî bêyî piştgiriya derve, li ser bingeha nirxên xwe yên civakî û mirovî mezin bûye û wekî tevgerek ‘bêdawî’ ye. Her kes dikare tê de cîhekî bibîne. Armanca gerîla ew e ku bi parastina mîrateya ku şehîdan hiştine, Kurdistanek azad pêk bîne. Ez bi vê wesîleyê 27’ê Mijdarê li Rêber Apo û malbatên şehîdan pîroz dikim.”

Gerîla Ronî Dersim, destnîşan kir ku PKK’ê di demên herî zehmet de ji bo gelê Kurd bûye vejînek nû û 27’ê Mijdarê li Rêber Apo, şehîdan û gel pîroz kir. Ronî Dersim, anî ziman ku Rêber Apo nasname, ziman û hestek azadiyê da Kurdan û got ku eger îro li her deverê zimanê Kurdî tê bikaranîn ev yek bi saya keda Rêber Apo ye. Gerîla Ronî Dersim, wiha got, “PKK bû henaseya artêşa jinê û bû pîvana jiyana azad ku bingeha xwe ji ramanên Rêber Apo digire. Rêber Apo ji cîhanê re nîşan da ku têkoşîna wekhev di navbera mêr û jinan de mimkun e. Baweriya ku jin dikarin li çiyayan şer bikin bi Rêber Apo re mezin bû.”

Gerila Andok Êrîş, jî wiha axivî, “Ez vê rojê destpêkê li Rêber Apo, li şehîdên şoreşê, hevrêyên girtî û li gelê me yê welatparêz pîroz dikim. Ez vê roja dîrokî ji bo hemû gelên cihanê pîroz dikim. Partiya PKK’ê partiya şehîdan e. PKK’ê li hemberî qirkirin û tinekirinê serî hilda. Ji wê rojê heta roja îro têkoşîneke herî xurt, di asta jor de dide meşandin. Ji ber ku PKK’ê ruhê hevrê Hakî Karer, Kemal Pîr û Mazlûm Dogan e. Ji ber wê PKK’ê tu car têk neçe.”

Andok Êrîş, anî ziman ku ew heta dawiyê piştgiriyê didin banga Aştî û Civaka Demokratîk a Rêber Apo û got, “Ala ku şehîdan dewrî me kiriye dê heta serketinê li ba be. Wê tu carî ew al nekeve û em ê soza xwe ya li hemberî wan pêk bînin. Ji bo vê yekê jî em ê bibêjin ‘Bijî Heqî, bijî Kemal û bijî Mazlûm Dogan.’ PKK dê her tim di dilê hemû gelan de zindî bimîne. Em 27’ê Mijdarê li Rêber Apo, şehîdên şoreşê û hemû gelan pîroz dikin.”

ANF/BEHDÎNAN/LOQMAN AVESTA