Jinên wê pêvajoyê bi serbixînin

Piştî 'Banga Aştî û Civaka Demokratîk' a Rêber APO, ji gelek beşên civakê bangên gavavêtinê li dewleta Tirk tên kirin û rêxistinên jinan jî bi çalakiyên xwe pêşengiya vê pêvajoyê dikin. Parlamentera DEM Partiyê ya Mêrdînê Bêrîtan Guneş Altin ku di 31’ê Gulanê de li Amedê bi beşdariya bi deh hezaran jinan beşdarî meşê bû, li ser mijarê ji ANHA'yê re axivî.

Bêrîtan Guneş diyar kir ku Banga Aştî û Civaka Demokratîk berpirsyariyên mezin danîne ser milê jinan û got:“Di vê bangê de peyamên girîng ji bo jinan hebûn. Li ser vê bingehê em têkoşîna xwe dimeşînin.”

Berpirsiyariyên girîng li pêş me ne

Bêrîtan Guneş bal kişande ser girîngiya konferansên ku parlameterên jin û Koalîsyona Jinan a Demokratîk a Herêmî ya Rojhilata Navîn û Bakurê Afrîkayê (NADA) organîze kirine û got:"Herî baş jin dizanin bê ka şer tê çi wateyê. Lewma jî yên ku vê pêvajoyê bi ser bixin dîsa dê jin bin.”

Bêrîtan Guneş xuya kir ku ji bo xurtkirina yekitiya jinan Konferansa Parlamenterên Jin hatiye lidarxistin û got:’’Ev ne cara yekê ye ku parlamenterên jin ên Kurd tên cem hev. Berê jî çalakiyên bi vî rengî hebûn. Ji Bakur, Başûr Rojava beşdarî çêbûn. Mixabin ji Rojhilat tevlêbûn çênebû lê peyama wan jî hate xwendin. Weke jin, ji bo ku em bi rola xwe ya pêşeng di xebatên yekitiyê de rabin, me nîqaşên girîng kirin. Armanca avakirina sekreteryaya xebatên yekitiya jinan derket holê. Wekî ku ji encamnameyê jî tê fêmkirin, wek jin me berpirsyariyên gelekî girîng dan ber xwe.”

Jin baş dizanin bê ka şer çiye?

Bêrîtan Guneş diyar kir ku ev xebat hewldanên ji bo mezinkirina têkoşîna navneteweyî ne û konferansa NADA'yê jî li ser vê bingehê dinirxînin. Bêrîtan Guneş diyar kir ku Rêber APO di hevdîtinên xwe yên li gel şandeya Îmraliyê de destnîşan kir ku pirsgirêka jinan ji pirsgirêka Kurd mezintir e û got:"Em dikarin bêjin ku ev pêvajo di esasê xwe de ji du milan ve tê meşandin. Hem wê bibe pêvajoyeke yekitiya neteweyî û têkoşîna ji bo mafên nasnameyî ya gelê Kurd û hem jî têkoşîna jinan a nasnameyê. Em van her du pirsgirêkan ji hev cuda nakin. Di meşa mezin a li Amedê de jinan peyameke zelal da. Silavên xwe ji Girava Îmraliyê re jî şandin û nîşan dan ku ew ê aştiyê hembêz bikin. Şer herî zêde zirarê dide bedena jinan. Jin ji her kesî baştir dizanin bê ka şer çi ye. Ji ber vê yekê jin wê bibin pêşengên aştiyê. Jin wê di pêvajoya pêş de jî pêşengiyê bikin.”

ANHA