Ji ber qeyûm di nava çopê de ma

Li Cizîrê di serdema qeyûm de parq û avahiyên navçeyê ku radestî saziyên dewletê hatibûn kirin, îro ji ber bê xwedî mane, hildiweşin û di nava çopê de mane.

Hikûmeta AKP'ê li gelek bajarên Kurdistanê di salên 2016 û 2024'an de qeyûm tayînî şaredariyan kir. Li navçeya Cizîrê ya Şirnexê jî di navbera sala 2016 û 2024'an de qeyûm tayînî şaredariyê kir. Qeyûm bi dehan avahî, wesayît û parqên şaredariyê radestî saziyên dewletê kirin. Ji 24 parqên Şaredariya Cizîrê 18 parq radestî saziyên cuda kirin. Lê ev sazî venêrîna van parqan nakin û parq û avahiyên di nava parqan de di nava pîsatiyê de dimînin.

Bêxwedî maye

Di navbera taxên Banê Senefîsê û Banê Xanê de di serdema qeyûm de li ser Çemê Dîcleyê pira peyarê hatiye çêkirin. Her wiha qeyûm avahiyên derdora pirê radestî Qeymeqamtiya Cizîrê kiriye û ev avahî ji ber ku qeymeqamtî lê nanêre di nava çopê de mane.

Derî hatine şikandin

Ev pira peyarê her roj ji aliyê hezaran welatiyan ve tê bikaranîn û derdora vê ji ber ku derdora pire nayê paqijkirin bêhnek nexweş derdikeve holê. Her wiha deriyên van avahiyan hatine şikandin û ji bo kesên meyvexwar bûye konaxa rûniştinê.

AW/ŞIRNEX/NEDÎM ORÛÇ