Cilûbergên gelêrî yên Kurdî beşek bingehîn a çanda Kurdî ne ku nasnameya çandî û netewî ya gelê Kurd tê de tê dîtin. Bi saya jinan heya îro jî cilûbergên Kurdî zindî mane. Şadan û Şanya wek du xwîşk bi hev re karê rêxistin û firotina qumaşê Kurdî dikin û çîroka xebata xwe vedibêjin. Şadan Farûq ku ji Hewramanê ye û nişteciha Silêmaniyê ye, karê harmonîkirina rengan û firotina qumaşê Kurdî dike û dibêje:“Bi xwîşka xwe re ev du salin ku bi rêya înternetê me dest bi firotina qumaşê Kurdî û di heman demê de rêxistina rengan kiriye. Sedema hilbijartina vî karî vedigere ser evîna malbata me bo cilên Kurdî ku gelek tên bikaranîn û girîngî pê tê dayîn. Ji bilî vê, armanca me parastina resen û taybetmendiyên çandî yên cilûbergên Kurdî ye, da ku nifşên paşerojê wan nas bikin û bi awayek zindî bihêlin.” Şadan Farûq, di heman demê de dayika sê zarokane. Wek dayikek, ew parastina zimanê Kurdî dike û zarokên xwe hînî devoka Hewramî dike û dibêje:“Malbata min gelek alîkariya min dike ji bo pêşvebirina karê min û xizmeta zêdetir a çanda Kurdî. Her wiha ez daxwaz dikim ku jin girîngiyê bidin şiyan û hunerên xwe û parastina tore û çanda Kurdî bikin.”
Her wiha Şanya Farûq, ku xwîşka Şadan Farûq e jî dibêje:“Ji ber ku cilûbergên Kurdî gelek di bûyer û ahengên taybetî de tên li xwekirin, ev fikir hat ku em rêxistina rengên cilûbergên Kurdî bikin û bikin kar û pîşeya xwe. Di dema bûyerên taybetî de, nemaze di cejn û Newrozê de, daxwazeke mezin li ser karê me heye ji bo qumaşan û rêxistina rengan.” Şanya Farûq di dawiya axaftina xwe de bang li jinên Kurd dike ku hez û evîna xwe bi rêya şiyanên xwe derxin û xewnên xwe bicih bînin.
ROJNEWS/SILÊMANÎ
