HRE'yê di salekê de 204 dagirker kuştin

Hêzên Rizgariya Efrînê (HRE) ragihand ku di nava sala 2022'an de wan 204 dagirkerên dewleta Tirk  kuştine. Li gorî daxuyaniyê, 20 ji wan dagirkeran polêsên taybet, 72 leşker û 112 jî çeteyên dagirkeran bûne.

HRE´yê bi daxuyaniyekê bîlançoya sala 2022'an a çalakiyên li dijî artêşa Tirk a dagirker û çeteyên wê, eşkere kir û got, "Di sala 2022ʹyan an de êrîşên artêşa Tirk û komên çete bi awayekî dijwar dewam kirin. Li herêmên dagirkirî mirovên welatparêz û bi rûmet hatin revandin, êşkence li wan hate kirin û hatin kuştin. Dîsa ji bo guherandina demografiya heremê polîtîkayên qirêjî yên dewleta Tirk di sala 2022ʹyan de jî dewam kir. Li kêleka wê, çeteyên diz û talanker ji bo berjewendiyên xwe yên şexsî, daristanên heremê tine kirin.

Li hember van pêkanînên dijmin, di nava sala 2022ʹyan de çalakiyên me yên tolhildan û bersivdayinê xurttir dewam kirin. Gelek çalakiyên bi bandor hatin lidarxistin. Bîlançoya şerê ku li herêmê çêbûye wiha ye:

Sala 2022ʹyan êrişên topbaranê yên artêşa Tirk a dagirker û çeteyên wê li ser herêmê bê navber dewam kir.

Seranserê salê herêmên me 27 hezar û 498 caran bi obus, havan û tankan ve herêm hatin topbarankirin.

Dagirkeran 7 sivîl şehîd kirin

18 caran êrişên balafirên şer û 13 caran jî êrîşên bi dronan çêbûn.

Di encama van êrişan de yek jê zarok, 7 welatiyên sivîl şehîd bûn, 10 jê zarok 44 welatî jî birîndar bûn.

Li baregehên wan li wan dan

Di sala 2022ʹyan de, li hember artêşa Tirk a dagirker û çeteyên wê 70 çalakî hatin lidarxistin. Di encama van çalakiyan de 20 polêsên taybet (PÖH), 72 leşkerên artêşa Tirk û 112 çeteyên wan hatin kuştin û 16 polêsên taybet, 67 leşker û 56 çete jî birîndar bûn.

Di encama çalakiyên hêzên me de 3 jê zirxî 14 seyare, tankek, 8 motorsîklet, 8 çeper, 5 kon, 2 mange, obusek, çekeke M-16, gelek cebilxane û alavên teknîkî hatin rûxandin. Derb li 2 kirpî, 1 akrep, 2 tank, 1 reo, 1 obus û seyareyekê hatin xistin. Dîsa di encamê çalakiyan de 8 çekên AK-47, 1 BKC, 1 B-7, 1 çeka sekvaniyê, 1 demançe, 4 bêtêl, 4 rext, 5 telefon û miqdarek mezin a cebilxaneyê ji aliyê hêzên me ve hatin desteserkirin.

Di sala 2022ʹyan de 19 hevrêyên me şehîd bûn.”

NAVENDA NÛÇEYAN