Ellbogen; enîşka nifşekî ciwan

• Filmê bi navê “Ellbogen” yê Aslı Ozarslan li Fûara Pirtûkan û Xelatên Sînemayê ya Frankfûrtê xelata “Adaptasyona Herî Serketî’ wergirt. Film bi serpêhatiya Xezal a ku diya wê Tirk û bavê wê Kurd e dadikeve. Xezal a ku ji Stenbolê ber bi Berlînê ji xwe re li cih û warekî digere da ku nasnameya xwe tê de ava bike.

DENİZ BABİR/FRANKFURT

Di Fûara Pirtûkan û Xelatên Sînemayê ya Frankfurtê de filmê Aslı Ozarslan ê bi navê “Ellbogen” (Enîşk) xelata “Adaptasyona Herî Serketî” wergirt. Filmê “Ellbogen” ku promiyera xwe li Festîvala Berlînê ya Filman(2024) pêk anî bû ji ber romana Fatma Aydemîr ku wê di sala 2017’an de nivîsandiye bûye sînema. Di filmde serpêhatiya Xezal tê vegotin. Diya Xezal Tirk û bavê wê jî Kurd e. Xezal jî yek ji wan ciwanan e ku ji Stenbolê bar dike Berlînê û li wir hewl dide ji xwe re karekî bibîne. Çîroka film xwe dispêre serpêhatiyeke rasteqîn û senaryoya film ji hêla Claudia Schaefer ve hatiye nivîsandin.

Derhêner Aslı Ozarslan bi filmê xwe yê “Ellbogen” (Enîşk) balê dibe ser ciwanên li Elmanya yên ku bi nijadperestî û vederkirinê rû bi rû dimînin. Aslı Ozarsalan ji bo filmê xwe got; “Film behsa cûdakarî û pêşbîniya li hember ciwanan ya li dibistan, kar û kalanan dike. Ev pirsgirêk sedemên rêwîtiya Xezal in jî ku ew ji Stenbolê ber bi Berlînê koç dike.”

Derhêner Aslı Ozarsalan beriya vî filmî filmê bi navê “Dil Leyla” (Ziman Leyla) çêkiribû. Ev film jî behsa serpêhatiya hevşaredara Cizîrî Leyla Îmret dike. Piştî ku ew romana Fatma Aydemir dixwîne pirr di bin tesîra wê de dimîne û di demeke kin de xwe digihîne Fatma da ku wê razî bike ji bo romanê adapteyî sînemayê bike. Ji lewma derhêner bi karaktera Xezal a di romanê de têkiliyeke taybet çêdike û pirr jê hez dike. Ozarsalan dide zanîn ku gotina Xezal a “Şerm ji tirsê xerabtir e” tim maye di bîra wê de û wiha dewam kir; “Diviyabû min li gor vê hevokê hin îmajan biafiranda. Ji bo vî tiştî heta ji min hat min xwe bêhtir nêzî karakter kir û min xwest rastiya wê baş fam bikim. Beriya ku ez li mafdarî û neheqiya wê bifikirim, min xwest behsa wê têkiliya ne ewle ya bi civakê re bikim û jê fam bikim.” Ji xwe film jî heta cihekî girêdayî romanê dimîne û ji deverekê şûnde tesîra senaryoya resen tê hîskirin. Ji lewma derhêner li bersiva van pirsan digere; “Gava mirov li derve ye xwe çawa hîs dike?”, “Gava mirov di nav civakekê de dijî çi hîs dike?”.

‘Bi karekterên xwe bawer bin’

Aslı Ozarslan dide zanîn ku heger derhênerek an jî sanaryonûsek bixwaze mijareke klîşe bi perspektîfeke nû vebêje, serketina senaryoyê girîng e û wiha pê de çû; “Me di derbarê karakter de xeber neda lê me rasterast bi karekter re axivî. Bi ya min film bi nihêrînên ji derve de na lê bi nihêrineke ji hundir ve bêhtir bi hêz dibin û tên temaşekirin. Di derbarê Xezal de pêşbîniyên min tine bûn û bêyî ku wê bidarizînim ez bi serpêhatiya wê daketim. Ew kesek e û hemû civakê temsîl nake. Filmên min vî tiştî fêr min kirin; bi karakterê xwe bawer be. Min ji Dil Leyla jî û ji Xezal jî bawer kir.”

Li mal û nasnameya xwe digere

Aslı Ozarsal dibêje; “Ez ji karên ku jinên ciwan ên bi hêz û hêrs dikin mijara xwe gelekî hez dikim” û wiha dewam dike; “Li Elmanyayê heger li hember navê we bêjeya ‘Elman’ tine be hûn bi gelek astengiyan re rû bi rû dimînin. Ji lewma heger ev bêje li hember navê we nîn be hûn rastî cûdakarî û neheqiyan tên. Xezal jî koçî welatekî wisa dike ku wî welatî qet nas nake. Di vir de guherînek dest pê dike. Di her gavê de van pirsan ji xwe dike; ‘Gelo divê mala min li kur be, ez dikarim li kur bijîm?’ , ‘Ez dikarim nasnameya xwe li kur bibînim, dikarim li kurê weke xwe bimînim?’”

‘Te melakê da min’

Filmê “Ellbogen” behsa nifşekî ciwan dike. Aslı Ozarslan wiha behsa bîranîneke xwe ya di dema nîşandana film de dike; “Piştî nîşandana film ciwanek hate cem min û ji min re got; ‘Mala te ava, te bi vî filmî malekê bexşî min kir.’ Ez pirr di bin tesîra vê gotinê de mam. Her wiha şiroveyên weke ‘Cara ewile ku di filmekî de jineke ciwan weke aktrîsa sereke cih girtiye’, ‘Ev film pirsgirêkên me vedibêje’, ‘Min di çapameniyê de qet tiştekî wisa nedît ku bi van pirsgirêkan dadikeve’ jî gelekî kêfa min anîn.”

Filmê “Ellbogen” piştî ku li festîvala Berlinale promiyera xwe pêk anî beşdarî gelek festîvalên din jî bû. Niha jî film li Elmanyayê di salonên sînemayê de tê nîşandan.