Desteya Çandê ya Kantona Cizîrê bi hevkariya Dîwana Wêjeyê ya Bakur û Rojhilatê Sûriyeyê 2 salan carekê di navbera mehên Cotmeh û Mijdarê de Mîhrîcana Wêjeyê ya Osman Sebrî li dar dixe.
Li gorî agahiyên ku me ji endama Rêveberiya Dîwana Wêjeyê ya Bakur û Rojhilatê Sûriyeyê û Botan Hoşê girtine, mîhrîcan di 3-5`ê Mijdarê de pêk tê û îsal pêşbirka mîhrîcanê berhemên şanoyê ye.
Botan Hoşê da zanîn ku li kêleka pêşbirkê dê di mîhrîcanê de çalakiyên wêjeyî û hunerî yên mîna semînerên têkildarî rewşa şanoyê li Bakur û Rojhilatê Sûriyeyê bên dayîn.
Têkildarî hejmara şanonûsên ku beşdarî pêşbirka mîhrîcanê ya 8`emîn bûne, Botan Hoşê diyar kir ku ew ê di roja dawîn a mîhrîcanê de agahiyê parve bikin. Pêşbirk ji bo berhemên (pirtûk) bi zimanê kurdî, erebî û suryanî hatiye organîzekirin, lê vê salê tenê berhemên bi zimanê kurdî û erebî beşdar bûne.
Mîhrîcan dê li hola Navenda Çand û Hunera Demokratîk a Mezopotamyayê (TEV-ÇAND) a li bajarê Qamişlo were lidarxistin.
Dê şanonûsên ku tev lî pêşbirka mîhrîcanê bûne, li ser astên yekemîn, duyemîn û sêyemîn bên xelatkirin. Berhemên ku xelat wergirtine dê ji aliyê komîteya amadekar a mîhrîcanê ve bên çapkirin û belavkirin.
Di Mîhrîcana Wêjeyê ya Osman Sebrî ya 7`emîn de (2023), pêşbirk a helbestan bû. Dê di mîhrîcana îsal de romannûsên ku wê salê xelat wergirtine, berhemên wan bên bi merasîmekê bên derxistin.
ANHA/QAMIŞLO
parvê bike
Nûçeyên ku dikare bala we bikşîne
