Bar giran e Êzîdî dilsoz in

• Hevserokên nû yên Meclîsa Xweseriya Demokratîk a Şengalê Naîf Şemo û Cîhan Celo dibêjin erka wan barekî giran e, lê ew ji bo xweseriya Şengalê tişta ji destê wan tê bikin.

ÎBRAHÎM ÊZIDÎ / ROJNEWS / ŞENGAL

Hevserokên Meclîsa Xweseriya Demokratîk a Şengalê Naîf Şemo û Cîhan Celo hîna nû di Kongreya Rêveberiya Xweser a Şengalê ya 5´an de hatin hilbijartin. Wan got, ew ê baweriya gel bi cih bînin û ev peyam dan: “Ev barekî giran e li ser milê me, lê em soz didin gelê xwe ku em ê bi erka xweseriya Şengalê rabin.”

Li nehiya Sinûnê ya ser bi Şengalê dawiya hefteyê Kongreya Meclîsa Xweseriya Demokratîk a Şengalê (MXDŞ) a 5´an bi rê ve çû. Kongrê hem bi beşdariya xwe ve hem jî bi peyam û biryarên xwe ve ji bo têkoşîna Şengala xweser û azad merheleyeke nû da destpêkirin. Rasthatina kongrê bi Cejna Çarşema Serê Nîsanê jî, hêvî û bendewariya destpêkeke nû xurttir kirin.

Di kongrê de hevserokên meclîsê, cîgirên hevserokan û 101 endamên meclîsa giştî hatin hilbijartin û wan bi sûndxwarinê dest bi kar û xebatên xwe kir. Hevserokên nû yên meclîsê û beşdarên kongrê, peyamên xwe ji bo dema nû, eşkere kirin.

Ji bo xweseriya Şengalê wê bixebitin

Hevserokê nû yê Meclîsa Xweseriya Demokratîk a Şengalê Naîf Şemo yek ji kesayetên nas ên Şengalê ye, ji bo baweriya bi vê erkê malavahiya gelê Şengalê kir û got, “Gelê me bawerî da me, ev barekî giran e li ser milê me, lê em jî soz didin civaka Êzîdî û gelê Şengalê ku vê erk û berpirsyariyê bi cidiyet pêk bînin.”

Hevseroka nû ya Meclîsa Xweseriya Demokratîk a Şengalê Cîhan Celo jî berê weke cihgir, di Desteya Rêvebir a Şengalê de kar û xebat dimeşandin. Cîhan Celo got, “Ji bo xweseriya Şengalê, ji bo azadiya gelê Êzîdî tişta ji me bê, em ê li ser şopa şehîdan, li ser fikra Serok Apo bi pêş bixin.”

Sal bi sal mezin bû

Yek ji beşdarên kongreyê, Endamê Mekteba Siyasî ya PADÊ, Kehtan Xelîl bû. Wî bi bîr xist ku meclîsa gel di rewşa giran a fermanê de hatiye avakirin û wiha peyivî: “Ev meclîs bû hêvî ku civaka Êzîdî careke din karibe vegere Şengalê. Sal bi sal jî ev kongre xurttir dibe. Vê Meclîsê bi 28 endaman dest pê kir û îro 101 endamên wê hene. Yek şax bû, îro 9 şaxên wê hene.”
Kehtan Xelîl bal bire ser rewşa Êzîdiyên li Efrînê jî û got, “Peyama Êzîdiyên Efrînê jî îro hatibû kongrê, Êzîdî bi bûyerên li Efrînê diqewimin bi êş in. Fermana ku di 2014’an de li Şengalê dest pê kir, îro li Efrînê dewam dike. Tişta ku DAIŞ’ê li Şengalê li Êzîdiyan ferz dikir, îro li Efrînê li Êzîdiyan tê ferzkirin. Berpirsyariya her kesî ye ku îro li Efrînê xwedî derkeve. Êzîdî mirinê qebûl dikin lê dest ji dînê xwe yê qedîm bernadin.”