Adare: Rojnamegerê kurdî çim, goş û ziwanê şarî yê

Edîtora kirmanckî ya JINNEWSî Gulçîn Adare derheqê hêrişê vera çapemenîya azade ya kurdî û tepiştişê rojnamegeran de qisey kerd.

Edîtora kirmanckî ya JINNEWSÎ Gulçîn Adare bale ante girîngîya çapemenîya azade û wina qisey kerd: “Rojnamegerê kurdî timî mîyanê şarî de bîyî û şarî ra yew ê. Rojnamegerî bixo çim, goş û ziwanê şarî yê. Benê eynika şaranê ke rastê zulmî yenê.”

Adare destpêkê qiseykerdişê xo de qala tarîxê rojnamegerîya kurdî û tarîxê qetilkerdişê rojnamegeran kerd û bale ante tarîxê xoverdayîşê çapemenîya kurdî ser û wina vat: “Ma eşkenê Tirkîya de çapemenî hîrê beşî de biercnê. Çapemenîya terefgire, çapemenîya muxalîfe, çapemenîya kurd û muxalîfe. Nê hîrê beşî de baro tewr giran, nêzdîbîyayîşo tewr bişîdet bêşik serê çapemenîya kurdî de yo. Bi fermî hemverê rojnamegeranê kurdan de cîyakerîya pîle yena kerdiş. Serranê 90an ra heta nika no wina bî û hema zî wina dewam keno. Xeylê xebatkarê çapemenîya kurdî ameyê qetilkerdiş, vînîkerdiş, îşkencekerdiş û tepiştiş. Kamcî îqtîdar ameyo, vernê de hedefê ci çapemenîya kurdî bîyo. Çike tena yê ke raştî vetê meydan, yê ke bi xirtî hemverê îqtîdarî de vindertê, yê ke bîyê vengê pêro ganeyan rojnamegerê kurdî bîyê. Înan sereyê xo da, la qetî heqîqet ra tawîz nêda û peyser game nêeşte. Hemverê çinkerdişî de çapemenîya kurdî her reye de hîna hêzdar bîya, hîna zêde faşîzmê înan deşîfre kerda û vengê raştî daya eşnawitiş.”

Adare dewamê ercnayîşanê xo de dîyar kerd de şexsê rojnamegeran de bêveng û bêvîrverdayîşê şarê kurdî yeno hedefgirewtene û vat: “Dewlete bi serran o hemverê şarê kurdî de polîtîkaya ke kurdan senî bêhêz verdo rayra bena. Linga tewr bihêz zî helbet çapemenîya.

Çapemenî, vengê şarî pêro dinya rê resnena. Ma pêro xêrê çapemenîya kurdî çîyê ke qewimîyenê musenê. Heta çapemenîya terefgire zî ge-ge xeberanê çapemenîya kurdî ra wey bena. Nê pêro hêrişî seba ke çîyê înan nimite nêmanenê û polîtîkayê şerî îfşa benê, virazîyenê. Ma îqtîdarê AKPyî de nê bi hawayêkê zelalî vînenê. Senî ke îqtîdar keweno tengî, hemverê rojnamegeranê kurdan de operasyonê destbendkerdişî dano destpêkerdiş û tepişneno û bi no hawa wazeno ke heqê xebergirewtişê şarî asteng bikero.”

‘Embazê ma lezabez bêrê veradayene’

Adare tewr peynî embazê aye yê rojnamegerî yê ke serbest ameyî verdayîş ardî vîr û zehmetîyanê rojnamegerîya cinîye ser o nê çîyî vatî: “Mîyanê serrêke de bi desan embazê ma yê rojnamegerî ameyî destbendkerdiş û tepiştiş. Sebebê tepiştişî zî faelîyetê înan ê rojnamegerîye bî. Her çî înan rê sey unsurê sucî ame mojnayîş. Nêzdîbîyayîşê îqtîdarî yê hemverê cinîyan zaf zelal werte de yo. Ma baş zanê ke no îqtîdar dişmenê cinîyan o. Çi destkewtişê cinîyan esto, wazeno çin bikero. Cinîyanê rojnamegeran bi xeberanê xo cinsperestî îfşa kerde û ewnîyayîşêko têduşt vet werte. Nê zî kanperestî bêrehet kerdî. Mudira Ajansê ma Safîye pêwa 15 embazanê xo ameye tepiştiş. Serrêke ya delîlêko ke înan sucdar bikerê çin o, la reyna zî serbest nînê veradayîş. Tewr peynî 9 embazê ma yê ke bi operasyonê Anqarayî amebî tepiştiş, serbest veradîyayî û Safîye zî newe veradayî la hema xeylê embazê ma zî paweyê azadîya xo yê. Ma wazenê ke embazê ma yê ke nika desteser bîyê, lezabez bêrê veradayîş. Tirkîya hetê nêzdîbîyayîşê rojnamegerî de rêza peyêne de ya. Ganî dinya nê çî bivîno û reaksîyonêkê girdî ramojno. Tîya de rojnamegerî nêeşkenê biasanî karê xo bikerê. Yê ke terefgirê îqtîdarî nêbê, yenê bêvengkerdiş. Îqtîdar wazeno meydan meydanê rojnamegeranê zûrekeran û qelemşoranê ey bibo. La ma do destûr nêdê nê û kerdişanê îqtîdarî ke bi talan, rant û zilmî ser de awan bîyî, her ware de îfşa bikerê. Ma rêça Apê Musa, Gurbetellî û Denîzan de yê. Ê do tu wext nêeşkê rojnamegerîya kurdî krîmînalîze bikerê.”

‘Rojnamegerî suc nîya’

Adare peynîya qiseykerdişê xo de venga wayîrvejîyayîşê çapemenîya kurdî kerd û da zanayîş ke rojnamegerî vîr û mezgê şar ê: “Ganî ma seba embazê ke nika zîndanan de yê paştdayîş bidê û rayaumûmî ser de zî teda bikerê ke hîna zêde vengê rojnamegeran bidê eşnawitiş. Rojnamegerê kurdî timî mîyanê şarî de bîyî û şarî ra yew ê. Rojnamegerî bixo çim, goş û ziwanê şarî yê. Benê eynika şaranê ke rastê zulmî yenê. Benê eynika tutanê ke yenê îstîsmarkerdiş, cinîyanê ke yenê qetilkerdiş, karkeranê ke keda ci yena binpaykerdiş, heywananê ke yenê îşkencekerdiş, yanî bi kilmî benê eynika pêro kerdişan. Coka zî dewlete hemverê na eynika ke heqîqetî ramojnena de bêzar a. Wazena ke na eynike perçe perçe bikera. La se bikera zî nêeşkena werte ra wedarna. Perçeyêko qij bimano zî do na eynike bereqnayîşê xo ra fek vera nêdo. Rêça heqîqetî de tim raywan bibo û do komelî zî wina agahdar bikero. Tewr peynî wazena vajî ke rojnamegerî suc nîya û qetî nîna muhakemekerdiş.”

XWEBÛN