Muzîkjen Dildar Enwer ji zarokatiya xwe heskirina wî ji fêrbûna sazê re hebû. Lewra tevî nebûna derfetên ku ji xwe re sazeke bikire, wî dest ji xewna xwe ya zarokatiyê berneda û bi çêkirina sazeke ji tenekeyê niha gihiştiye asta mûzikjenek profesyonel.
Hunermend Dildar Enver ji Rewanduzê ye û bîst salane li Ranyayê dijî. Tevî astengiyên malbat û rewşa aborî, dest ji xewna xwe zarokatiya xwe berneda ku ew jî jenîna amûrên mûzîkê bû ango mûzîkjenî. Wî di zarokatiyê de bi dar û qutiyên konserveyê amûra xwe ya yekem çêkir, niha ji bang li ciwanên Herêma Kurdistanê dike ku berê xwe bidin cîhana muzîkê. Ew cîhana mûzîkê wek çareseriya aramiya ruh û xemgîniyê binav dike.
Dildar Enver, mûzîkjeneke ku çîroka têkoşana wî ya ji bo gihiştina xewn û armancên wî, bûye nimûneyek ji bo ciwanan. Ew ji zaroktiyê ve xwediyê eşqa muzîkê û bi taybetî enstrûmana sazê ye.
Ji dar û tenekeyan sazek çêkir
Asteng û girêdanên li pêşiya xewna Dildar gelek bûn. Eşkeretrîn astengî dijayetiya malbata wî û pirsgirêka aborî bû. Di derbarê vê yekê de dibêje “Astengiya herî mezin ji min re malbata min û aliyê aborî bû. Dayik û bavê min ji min re digotin ‘ev ji te re nabe’. Lê min dev jê berneda û her li pey vê xewna xwe ya zarokatiyê çûm.” Eleqeya wî ya xurt bi muzîkê re hişt di demekê de ku amûrên muzîkê pir kêm bûn, kirîna wan pir biha bûn, wî bixwe ji xwe re sazek çêkir. Di vê derbarê de wiha got; “Wê demê amûrên mûzîkê kêm bûn. Ji ber xwesteka min a zêde ya ji mûzîkê re, min ji dar û teneke ji xwe re sazek çêkir. Dema ku min têla saza xwe girêda, min dît ku bi rastî jî dengek yê nêzîkî sazê jê derdikeve. Vî dengî bi min re hestek pir xweş çêkir.”
‘Bila ciwan berê xwe bidin muzîkê’
Dikana Dildar Enwer li Ranya niha bûye cihekî ku ciwan ji bo fêrbûnê berê xwe didinê û di vê derbarê de wiha got; “Kesên ku tên ba min ciwanin. Piraniya mirovên li vir ji amûran hez dikin. Hemû amûr taybetin, lê saz xeyal û hewesa min a zarokatiyê ye.” Hêvî û xewnên Dildar Enver pir hene ku bi taybetî di warê hunerê de li herêma xwe. Ew dibêje ciwan wextê xwe bêkar derbas dikin û bang li wan dike ku berê xwe bidin muzîkê. Di dewamê de got; “Ez gelek baş dibînim ku xelk zêdetir girîngiyê bidin hunerê. Ji ber ku huner li vê herêmê ne di astekî baş de ye. Ciwan li vir li şûna wê ku bêkar rûnişîne, dikare fêrî amûrek bibe, ev ji bilî fêrbûnê, dibe sedema aramiya dil û ruhê mirov jî.”
Di dawiyê de mûzîkjen Dildar Enver muzîkê wek çareseriyeka girîng ji bo pirsgirêkên derûnî dibîne û dibêje: “Dema amûrek mûzîkê dijenî, di nav xwe de hestek aram hîs dikî. Muzîk ji kesên xemgîn re baştirîn çaresere. Dema ku ez xemgîn yan aciz bim, ji xwe re li saza xwe dixim. Di dema rahênanê de ez diçim dinyayeka taybet û demê min bilez derbas dibe.”
ROJNEWS/RANYA
parvê bike
Nûçeyên ku dikare bala we bikşîne
