Mîrateya Gûrbetellî Ersoz kevneşopiyek e

Serlêdanên ji bo Xelatên Rojnamevaniya Jinê ya Gûrbetellî Ersoz ku îsal cara yekem tê lidarxistin, berdewam dikin. Endama Lijneya Rêveberiyê ya MKG'ê Derya Ceylanê got ku mîrateya ku Gûrbetellî Ersoz bi gotin, pênûs, hêz û têkoşîna xwe hiştiye kevneşopiyek e.

Serlêdanên ji bo Xelatên Rojnamevaniya Jinê ya Gûrbetellî Ersoz ku îsal cara ewil ji hêla Komeleya Rojnavanên Jin a Mezopotamyayê (MKG) ve tê lidarxistin, didomin. Serlêdanên pêşbirkê ku ji bo bîranîna Gurbetellî Ersoz û rojnamevanên jin ên ku jiyana xwe ji dest dane tê lidarxistin, di 17'ê Hezîranê de dest pê kir û dê heta 28'ê Îlonê berdewam bike. Xelat dê di çar kategoriyan de werin dayîn: "Nûçeyên Kurdî", "Nûçeyên Tirkî", "Wêne" û "Nûçeyên Bidîmen". Nûçeyên serketî yên rojnamevanên jin dê di 6'ê Cotmehê de werin aşkerakirin. Xelat dê bi merasîmekê (8'ê Cotmehê, roja ku Gurbetellî Ersoz jiyana xwe ji dest daye) werin dayîn.

Endama Lijneya Rêveber a MGK'ê Derya Ceylan, li ser armanca pêşbirkê axivî û ji bo serlêdanê bang li rojnamevanên jin kir.

Derya Ceylan diyar kir ku yekem gerînedeya weşana giştî ya jin a li Tirkiyeyê Gûrbetellî Ersoz, parastina rastiyê û di rojnamevaniyê de nêrîna jinan wekî mîrate ji wan re hiştiye. Derya Ceylan destnîşan kir ku ev pêşbirk ku li ser navê wê tê lidarxistin, ji bo dîtina têkoşîna rastiyê ya ku bi pênûsa jinan hatiye afirandin pir girîng e. Derya Ceylan destnîşan kir ku xebata rojnamevanên jin di çapemeniya serdest a mêran de pirî caran nayê dîtin û got: "Ev pêşbirk ji bo berbiçavkirina hêla polîtîk hem jî hêla etîk a rojnamevaniya jin de girîng e. Wekî MKG'ê me xwest ku bi Xelatên Rojnamevaniya Jinê ya Gûrbetellî Ersoz rojnamevanên jin berbiçavtir bikin."

Derya Ceylan got ku mîrateya ku Gûrbetellî Ersoz bi gotin, pênûs, hêz û têkoşîna xwe hiştiye kevneşopiyek e û got: "Em vê kevneşopiyê îro, hem li qadê û hem jî li hundir didomînin. Bi pênûsa xwe, bi kamerayên xwe û bi wênegirên xwe tomar dikin û dinivîsin. Lê dema ku em vê kevneşopiyê didomînin, em bi gelek zextan re jî rû bi rû dimînin. Ev zext carinan li qadê dibe sedema tacîza polîsan û carinan jî dibe sedema lêpirsîn û dozên dadgehê. Ji bilî van û zextên bi vî rengî, jin di çapemeniya serdest a mêran de ne xwedî gotin in. Rojnamevanên jin jî armanc dikin ku vê feraseta ku ji hêla mêran ve serdest e ji holê rakin û bibin alternatîfek ji bo çapemeniya mêran a serdest. "

MA/AMED / RÛKIYE PAYIZ ADIGUZEL