Mînaka sekna zelal a xeta APO’yî

• HPG-NRÇ’ê gerîlayê li Qada Dersimê şehîd bû, bi bîr anî û got:’’Em soza xwe nû dikin ku bîranîna hevrêyê xwe Botyan her tim bidim jiyîn û ala têkoşînê ya ku dewrî me kirî, bi serketinê tacîdar bikin.”

Navenda Ragihandin û Çapemeniyê ya HPG’ê (HPG-NRÇ) derbarê gerîlayê şehîd Botyan Amed ku li Dêrsimê şehîd bû ev agahî parve kirin:“Em hevrêyê xwe Botyan Amed bi rêzdarî û minetdarî bi bîr tînin ku 23’ê Tebaxa 2019’an dema li Qada Dersimê li ser wezîfeya xwe di êrîşa dijmin de tevlî karwanê şehîdan bû. Hevrêyê me li Bakurê Kurdistanê ji bo bibe layiqê şehîdan gelek wezîfeyên zehmet bi cih anî. Bi hevrêtiya xwe ya kûr, tevlîbûna xwe ya dirûst û sekna xwe ya zelal a li ser xeta Apoyî milîtanek mînak bû. Ji bo bi ser xistina têkoşîna me û parastina destkeftiyên gelê me, li Bakurê Kurdistanê bi îradeyeke mezin gerîlatiyeke xurt kir û îspat kir ku xwedî karakterekî welê ye ku têk naçe. Hevrêyê me Botyan bi fedakariyeke mezin li dijî her cure zehmetiyê rabû û ji bo parastina hebûn û azadiya gelê me, weke yek ji lehengên fedayî navê xwe li dîroka me ya têkoşînê nivîsand. Hevrêyê me Botyan têkoşîna xwe ya bi coş, kelecan û hezkirina azadiyê destpê kirî, di lûtkeyê de temam kir. Em soza xwe dubare dikin ku bîranîna wî her tim bidim jiyîn û ala têkoşînê ya ku dewrî me kirî, bi serketinê tacîdar bikin. Weke hevrêyên wî, di serî de malbata hêja ya hevrê Botyan em ji hemû gelê Kurdistanê yê welatparêz re sersaxiyê dixwazin û soza xwe nû dikin ku bîranînên şehîdên xwe yên leheng timî bidin jiyîn.

Bi xîreta têkoşînê ezmûn wergirtin

Hevrêyê me Botyan weke ferdê malbatek welatparêz li navçeya Dara Hênî ya Çewligê hate dinê. Ji ber ku malbata wî û xizmên wî yên nêz di nava têkoşînê de bûn û xwedî li nirxên Kurdîtiyê derketin, ew jî girêdayî cewherê xwe mezin bû. Lewma di temenek biçûk de PKK nas kir. Ji bo bi têkoşîna azadiyê ya gelê me re bibe yek, tevlî xebatên ciwanên welatparêz û şoreşger bû. Bi taybetî êrîşên çeteyên DAÎŞ’ê yên li dijî Kobanê, komkujiyên li wir pêk anîn û piştgiriya dewleta Tirk a ji bo van êrîşên dermirovî, ji bo hevrêyê me Botyan bû xala dawî. Hevrêyê me fikirî ku li dijî van êrîşên dijmin, wê li çiyayên Kurdistanê bibe gerîla û bi vî rengî bersiva herî baş bide dijmin. Li ser vî bingehî berê xwe da çiyayên azadiyê û tevlî nava refên gerîla bû. Hevrêyê me Botyan ê ku di sala 2016’an de berê xwe da Bakurê Kurdistanê, tevî ku gelekî dixwest derbasî Eyaleta Amedê bibe jî ji ber hewcehiyan derbasî Eyaleta Erziromê bû. Hevrêyê me bi enerjiya xwe ya ciwantiyê, hêrsa xwe a li hemberî dijmin û xîreta xwe ya têkoşînê di demeke kurt de gelekî tecrûbeyan bi dest dixe. Hevrêyê me yê ku piştî demekê li Erziromê ma û piştre derbasî Dersimê bû, heman tempoya têkoşînê li wir jî nîşan da. Hevrêyê me yê ku haya wî ji têkoşîna me ya azadiya Dersimê û girîngiya wê ya dîrokî ya ji bo gelê me heye, dizanî ku divê têkoşîna li vir zêdetir were mezinkirin û di vê çarçoveyê de tevgeriya. Hevrêyê me Botyan ê ku di 23’yê Tebaxa 2019’an de li Dersimê di encama êrîşeke dijmin de tevlî karwanê nemiran bû; wê bi kesayeta xwe ya jidil, durist û sade û dilsoziya xwe ya bêhesab a ji bo nirxên xwe û hêrsa xwe ya li hemberî dijmin a kûr tim di nava têkoşîna me de bijî û wê bibe meşaleyeke ku rêya têkoşîna me ronî dike. Di şexsê hevrêyê me Botyan de em soza xwe dubare dikin ku em ê xeyalên hemû şehîdên xwe pêk bînin.’’ Agahiyên derbarê nasnameya hevrêyê me yê şehîd bi vî rengî ne:

Botyan Amed (Berat Nazlican), li Dara Hênê jidayîk bûye, 23’ê Tebaxa 2019’an li Dêrsimê şehîd bû.

BEHDÎNAN