Mihrîcana 4’ê Nîsanê ya Çand û Werzîşî ya ji bo rojbûna Rêberê Gelê Kurd Abdullah Ocalan her sal ji aliyê Qada Perwerdê ya Wargeha Penaberan a Şehîd Rustem Cûdî (Mexmûr) tê li dar xistin. Îsal 17’emîn mîhrîcan di 18’ê Sibatê de bi turnovaya futbolê dest pê kir û bi vekirina pêşangehê dewam dike.
Pêşangeh li salona konferansê ji gel re hat pêşkêş kirin. Berhemên ku ji aliyê endamên Atolya Şehîd Delîla û xwendekarên dibistanên Seretayî, Navîn û Amedeyî ve hatin amadekirin, di pêşangehê de hatin pêşkêş kirin.
Beriya pêşangeh were vekirin ji bo tevayî cangoriyên azadiya Kurdistanê deqeyek rêz hate girtin. Piştî rêzgirtinê, li ser giringî û wateya rojê mamosta Ferhat Kaçan axivî.
Ferhat Kaçan, di destpêka axaftina xwe de 4’ê Nîsanê rojbûna Rêberê Gelê Kurd Abdullah Ocalan pîroz kir û wiha got: “Em vê rojê ne tenê weke jidayîkbûnekê dinirxînin. Her wiha weke avabûn, berxwedan û serhildanekê jî dibînin. Em wek qada perwerde û xwendekarên Rêber Apo vê rojê diyarî hemû mirovahiyê dikin.”
Wê pêşangeh heta 4’ê Nîsanê ji gel re vekirî be û wê sibe danê siharê jî pêşbirkên werzîşî yên di navbera dibistanan de li saha futbolê were li darxistin.
NÛJINHA/MEXMÛR
