Komîteya Perwerde û Fêrkirinê ya Civaka Demokratîk (KPC-D) li Helebê yekemîn dibistana bi navê şehîd Qehreman Efrîn vekir ku tê de materyalên Rêveberiya Xweser ên bi zimanên Erebî û Kurdî ji bo dersan tên bikaranîn.
Dibistan li Kolana Mizgefta Mezin a Şêxmeqsûdê ye. Komîteyê dibistan ji bermahiyên şer paqij kir û nû kir.
Kadroya perwerdeyê ya dibistanê ji 40 mamosteyan pêk tê. Ev mamoste dê zêdetirî 600 xwendekarên refên seretayî, navîn û amedehî perwerde bikin.
Ji bo ku xebatên perwerdeyê baş bên meşandin, KPC-D’ê maşîna birin û anînê ji xwendekaran re bê pere dabîn kir, pênûs û lênûsk li xwendekaran belav kirin.
Li gorî endamê rêveber ê KPC-D’ê Mihemed Behrî, dibistan 5`ê Îlonê hat vekirin. Behrî da zanîn beriya vekirina dibistanê, wan bi tevlêbûna meclîs û komînan hemleyên ravekirina girîngiya zimanê dayikê di nava şêniyên taxê de li dar xistiye.
Behrî piştrast kir ku ji bo ku fêrkirina materyalên Rêveberiya Xweser ên zimanên Kurdî û Erebî wan derfetên pêwîst peyda kirin: "Di materyalên Rêveberiya Xweser de cudahiyeke balkêş heye, ew jî tê de du madeyên girîng hene; jineolojî û çand û sinc."
Behrî bang li xelkê kir û got: "Divê zarokên we bi zimanê dayikê fêr bibin da ku civak li gorî qonaxa heyî bi pêş bikeve."
Hêjayî gotinê ye ku li Dibistana Şehîd Qehreman berê perwerde bi zimanê Kurdî dihat kirin, lê belê îsal bi zimanên Kurdî û Erebî li gorî materyalên Rêveberiya Xweser hat vekirin.
ANHA/HELEB