“Kaniya Trevî” ya ku li Romayê dimîne piştî 10 salan dîsa tê restorekirin. Şaredariya Romayê da zanîn ku wan dest bi xebatê kiriye û ew ê kanî demekê ji serdêran re girtî be. Kaniya Trevî yek ji wan cihan e ku dema turîst diçin Romayê xwe lê dikşînin û diçin dibînin. Gava turîst diçin vê kaniyê bibînin pereyên hesin davêjin nav ava kaniyê da ku xwestekên wan bi cih werin û bigihîjin mirazên xwe.
Piştî restorasyona kaniyê bi dawî bû ew ê turîst bi pirên portatîf kaniyê û her wiha peykerên li dora kaniyê baştir bibînin. Her wiha ew ê derûdora kaniyê bi bariyerên şefaf werin dorpêçkirin. Ew ê xebata restorasyonê 3 mehan bidome. Şeradarê Romayê Roberto Gualtieri da zanîn ku ew ê Kaniya Trevî piştî Adara 2025’an ji nûve vebe.
Her sal 4 milyon kes diçin serdana Kaniya Trevî. Ev jî tê wê maneyê ku rojane 10-12 hezar kes kaniyê dibîne. Kaniya Trevî di sala 1732’an de ji hêla mîmarê bi navê Nicola Salvi ve hatiye çêkirin. Kaniya Trevi yek ji nimûneyên mîmariya serdema Barokê ye.
ROMA
