Ji bo Werîşe Mûradî peyama piştevaniyê

Çarşem 9 Nîsan 2025 - 03:10

Parêzvana Mafê Mirovan a li Îranê girtî Nergîz Mûhammedî ji bo Werîşe Mûradî ya cezayê îdamê lê hatiye birîn peyama piştevaniyê weşand. Nergîz Mûhammedî got:” Bi hêvî me ku rojekê em ê cezayê înfazê bi temamî rakin. Ew roj wê diyarker be û bibe wesîleya serketinên nû."

Nergîz Mûhammedî cezayê darvekirinê yê li Werîşe Mûradî hatiye birîn şermezar kir û got, "Cezayê darvekirinê -bi taybetî di sîstemeke dadgeriyê de ya ku serxwebûna xwe winda kiriye- binpêkirina mafê bingehîn ê mirovan e." Nergiz Mûhammedî ji ber vê yekê xwest, cezayê darvekirinê bê rakirin û got, "Di rejîmên zordar de ji ber ku sîstema edaletê serî li ber desthilatdariya otorîter ditewîne, rabûna li ber cezayê darvekirinê divê meseleya her kesî be."

Nergîz Mûhammedî bal kişand ser girîngiya têkoşîna li dijî cezayê darvekirinê ku parçeyekî berxwedana li dijî rejîma otorîter a li Îranê ye û got, "Rejîm înfazê weke amûreke zordariyê bi kar tîne." Nergiz Mûhammedî diyar kir ku muxalefeta civakî divê ne tenê guherîna siyasî ji xwe re bike armanc, her wiha divê rakirina cezayê darvekirinê jî bike armanca xwe.

Parêzvana mafên mirovan herî dawî got, "Ji bo vê têkoşînê bimeşînin, em neçar in makîneya înfazê ji hev belav bikin, wergirtin û bicihanîna biryarên darvekirinê asteng bikin. Bi hêvî me ku rojekê em ê cezayê înfazê bi temamî rakin. Ew roj wê diyarker be û bibe wesîleya serketinên nû."

ANF/NAVENDA NÛÇEYAN 

parvê bike

   

Yeni Özgür Politika

© Copyright 2025 Yeni Özgür Politika | Mafên belavkirinê parastî ne.