Gotinên Fîdan neyartiya gelê Kurd e

Hevserokê Kongra GEL Remzî Kartal di hevpeyvîna xwe de li ser gotinên Wezîrê Karên Derve yê Tirkiyeyê Hakan Fîdan ên derbarê Bakur û Rojhilatê Kurdistanê nirxandin kirin.

Remzî Kartal got:“Ev neyartiya gelê Kurd e. Ev daxwaza têkbirina destkeftiyên gelê Kurd e. Ji ber vê yekê ev siyaseta Hakan Fîdan bi xwe xetere ye. Bi vê siyasetê ne li Tirkiyeyê aştî çêdibe, ne jî pirsgirêkên nava Sûriyeyê çareser dibin.”

Divê dewlet hebûna Kurdan qebûl bike

Kartal di dewama nirxandina xwe de wiha got:’’Bi rastî nêzîkatî û axaftina Wezîrê Karên Derve yê Tirkiyeyê Hakan Fîdan wekî konsepta siyaseta dewletê ye ku hebûna Kurdan ji bo xwe wekî dijmin dibîne, xetere dibîne, wekî xeta sor dibîne. Hakan Fîdan bi uslûb, nêzîkatî û gefên li ser Rojava di asteke gelekî jor, bêhûrmet û vekirî vê siyaseta xwe dimeşîne. Ev siyaset ne li gorî pêvajoya Bakurê Kurdistanê ye, ne jî li gorî pêvajoya li Îmraliyê ye. Rêber Apo û dewlet du aliyên vê pêvajoyê ne. Pêvajoya ku Rêber Apo daye destpêkirin, ew e ku dewlet dev ji neyartiya dijî gelê Kurd berde, înkar û tinekirinê dev jê berde, hebûna gelê Kurd qebûl bike. Gelê Kurd jî dewletê wekî dewleta xwe qebûl bike. Dewleta Tirk bibe dewleta gelê Tirk û Kurd…

Siyaseta Hakan Fîdan xetere ye

Niha li Sûriyeyê dewlet tine, siyaset tine, qanûn tine. Rewşa Şamê li holê ye. Tiştên ku li serê Elewiyan hatine diyar in, tiştên ku li serê Durziyan hatine li holê ne. Sedema wê jî rêveberiya Şamê ye. Ji ber ku ne qanûn heye, ne tiştek heye, pêkhateyên Sûriyeyê li holê tine ne. Gelo Hakan Fîdan li ser kîjan esasê dibêje QSD, rêveberiya xweser, YPG, YPJ xwe belav bikin û xwe radestî HTŞ’ê bike? Ev neyartiya gelê Kurd e. Ev daxwaza têkbirina destkeftiyên gelê Kurd e. Ji ber vê yekê ev siyaseta Hakan Fîdan bi xwe xetere ye. Bi vê siyasetê ne li Tirkiyeyê aştî çêdibe, ne jî pirsgirêkên nava Sûriyeyê çareser dibin.

ANF/ARÎF ARSLAN