Dagirkeriyê rawestînin!

• Partî û rêxistinên siyasî yên Kurd û Suryanî ji rayedarên payebilind ên Komara Erebî, Iraq, Sûriye, KE, DYE, NATO û NY’ê re nameyek vekirî şandin û ev bang hate kirin: Stratejiya şer û dagirkeriya dewleta Tirk tavilê rawestînin.

Derveyî partî û rêxistinên siyasî yên Kurd û Suryanî, Komîteya Dîplomasiya Hevpar a ku ji Komîsyona Têkîliyên Derve ya Kongreya Neteweyî ya Kurdistanê (KNK) pêk tê, têkildarî dagirkeriya dewleta Tirk a li ser Başûrê Kurdistanê nameyeke vekirî ji Sekreterê Giştî yê Komara Erebî Ahmed Aboul Gheit, Serokwezîrê Iraqê Muhammed Şiya Es Sudanî, Serokkomarê Sûriyeyê Beşar Esad, Sekreterê Giştî yê Neteweyên Yekbûyî Antonio Guterres, Serokê DYE’yê Joseph R. Biden, Sekretera Giştî Marija Pejčinović Burić, Seroka Komîsyona Ewropayê Ursula von der Leyen û Sekreterê Giştî yê NATO’yê Jens Stoltenberg re nivîsandin. Nameya vekirî ya ku Partî û Rêxistinên Siyasî yên Kurd û Suryanî yên Komîsyona Têkîliyên Derve ya KNK’ê li ser navê Komîteya Dîplomasiya Hevpar nivîsandî, bi vî rengî ye:“Pêla bihara Erebî di sala 2011’an de destpê kir û heta Iraq û Sûriyeyê belav bû. Dewleta Tirk xwest ji vê sûd wergire û hêviyên xwe yê Mîsakî Mîllî bi cih bîne (Li gorî vê belgeya 104 sal berê, bi navê Ahdî Mîllî herêmên Bakurê Iraq û Bakurê Sûrî di nav sînorên Tirkiyeyê de hatibû qebûlkirin). Dewleta Tirk hewl da Neo Osmanîtiya xwe jinûve zindî bike û vegere li ser van sînorên xwe yên berê. Ji bo vê jî li hemberî gelê Kurd, dest bi êrişên dagirkerî û komkujiyê kir.

Serokkomarê Tirk Recep Tayyîp Erdogan di piranî daxuyaniyên xwe de eşkere digot ku Heleb, Mûsil, Silêmanî, Kerkûk, Şengal û Behdînanê di nav sînorên Mîsakî Mîllî de ne û ew ê tevahî van qadan dagir bikin. Û bi salane serokê partîya neteweperestên tundrew MHP Devlet Bahçelî bi eşkere dibêje, Kerkûk bajarê 82’yemîn û Mûsil jî bajarê 83’yemîn ê Tirkiyê ye. Bi taybetî hevalbendên xwe yên Turkmen bi çek dikin û bi wan kaos û krîzan çêdikin.

Efrîn Girê Spî Serêkanî niha jî Başûr

Dewleta Tirk bi çeteyên xwe, di sala 2014’an de xwest Kobanê dagir bike. Lê rû bi rûyê berxwedana bê hempa bû û bi binket. Lê mixabin, di siyaseta qada navdewletî de bi pêkanîna dîplomasiya manîpulatîf encam bi dest xwe xist û di sala 2018’an de Efrîn û di sala 2019’an de jî Serêkanî û Girê Sipî dagir kir. Di heman demê de, bi zêdekirina baregehên leşkerî li Başûrê Kurdistanê ku dewleteke federe ya di bin serweriya dewleta Iraqê de ye, zemînek ji bo dagirkeriyê amade kir.

Maskeya dijberiya PKK’ê

Bi maskeya ‘Ez li dijî PKK'ê şer dikim’ êrîşên xwe yên dagirkeriyê pêş xist. Lê belê weke ku Radyoya Dengê Emerîka herî dawî li Başûrê Kurdistanê nîşan da, leşkerên Tirk niha bi hezaran leşker û 300 tankan 30 km ketine hundir û xwe wek xwediyê herêmê dibînin, kontrola nasnameyan li gel dikin. Bêguman ev rewşa nû ne tenê ji bo me Kurdan, lê belê ji bo kûrkirina krîzeke giran û ji bo tevahiya Rojhilata Navîn bêîstîkrariyeke mezin e. Ji aliyê din ve ev yek bi awayekî eşkere guhnedana hiqûqa navneteweyî û binpêkirina peymanên navneteweyî ye. Dewleta Tirk bi rejîma Erdogan-Bahçelî re çi dibe bila bibe bi her awayî dixwaze Mîsakî Millî pêk bîne. Ji bo vê jî ji destpêka sala 2024’an û vir ve lez dan xebatên xwe yên dîplomatîk û leşkerî. Bi siyaseta manîpulatîf jî hikûmeta Iraqê bê bandor û pasîf kirin. Serkeftina stratejiya Mîsakî Mîllî li Kurdistanê wê bibe sedema dagirkirina Iraq û Sûriyê û wê nakokiyên herêmî  kûr bike û koçkirina bi milyonan mirovan bi xwe re bîne. Lewma stratejiya şer a niha li Kurdistanê tê meşandin hemû Rojhilata Navîn û cîhanê eleqedar dike.

Em ti carî serî natewînin!

Weke partiyên siyasî û rêxistinên sivîl ên Kurd ên li jêr îmze kirine, ji bo sekinandina vê dagirkeriyê di serî de hikûmetên Iraq û Sûriyeyê, Komkara Erebî; ji pêkanîna normên hiqûqî yên navneteweyî berpirsiyarin wek Neteweyên Yekbûyî; Konseya Ewropa û NATO ku Tirkiye endamê wanin, Yekîtiya Ewropa û Dewletên Yekbûyî yên Emerîkayê ku bi dewleta Tirk re xwedî têkiliyên stratejîk in, em bang li we dikin ku destûrê nedin dagirkeriya dewleta Tirk. Weke Kurd me tu carî serî li ber tu dagirkeran netewand. Em diyar dikin ku em ê ji bo welat û siberoja xwe ya azad bi biryar li berxwe bidin. Em bang li her kesî dikin ku pêşî li dagirkeriya dewleta Tirk a ku bûye topek agir bigrin û ji bo çareseriya siyasî ya pirsgirêka Kurd bikevin nava tevgerê.”

NAVENDA NÛÇEYAN