Yekîtî ji bo herêmê girîng e

Şandeyeke ji DEM Partî, DBP û TJA pêk dihat, di 25-29’ê Adarê de li Herêma Kurdistanê gelek hevdîtin kirin. Hevserokê Giştî yê DBP’ê Keskîn Bayindir, Hevberdevkên Komîsyona Têkiliyên Derve ya DEM Partiyê Berdan Ozturk û Ebrû Gunay, Parlamentera DEM Partiyê ya Mêrdînê Saliha Aydenîz û endama TJA’yê Adalet Fîdan di hevdîtinan de cih girtin. Şandeyê, bi Serokkomarê Iraqê Adullatîf Reşîd, Waliyê Silêmaniyeyê, KNK, Tevgera Goran, Tevgera Helwest û Eniya Gel re hevdîtin kirin. Her wiha bi nûnerên Misilman, Zerdeştî, Êzidî, Kakayî, Katolîk û hwd. û rewşenbîr, nivîskar û akademîsyenên herêmê re jî hevdîtin hatin kirin. Ji endamên şandeyê Saliha Aydenîz têkildarî hevdîtinan ji ajansa me re axivî. Saliha Aydenîz, da zanîn ku hevdîtinên xwe di çarçoveya banga Rêberê Gelê Kurd Abdullah Ocalan de kirine û got:“Birêz Ocalan berpisyartiyeke dîrokî li xwe girt. Ne tenê xîtabî Tirkiyeyê kir, her wiha xîtabî hemû gelên Rojhilata Navîn û cîhanê kir.” 

Helwest erênî bûn

Saliha Aydenîz, diyar kir ku di serdanan de li ser naveroka bangê, dema wê û derfetên dîrokî yên afirandî nîqaş kirine û got:“Armanca serdana duyemîn, xurtkirina yekitiya neteweyî bû. Di serdanên Silêmaniyeyê de em li ser rola partiyên Kurd a di yekitiya Kurdan de sekinînin. Hemû derdoran girîngiya yekitiya Kurdan a di çareseriya pirsgirêkê de vegotin. Helwestên pir erênî derketin pêş. Bi taybet jî Kurdên li Başûr gotin ku ew di ferqa berpirsyartiya xwe de ne. Em keyfxweş bûn ku tevek jî li benda aştiyê ne.” Saliha Aydenîz, destnîşan kir ku serdana wan a duyemîn li gorî yên berê befirehtir bû û got:“Van hevdîtinan ev yek bi eşkere nîşanî me da; nîqaşa rû bi rû ji bo xwedîderketina li pêvajoyê girîng bû. Serê her kesî zelal bû. Weke DEM Partiyê em jî dê rola xwe çalak pêk bînin û vê pêvajoyê bi ser bixin.” 

Têkoşîn a tevahiya gelê Kurd e 

Saliha Aydenîz, anî ziman ku banga Rêber APO ji bo yekitiya neteweyî ya gelê Kurd zemîneke girîng ava kiriye û got:“Lê divê mirov vê jî diyar bike; ev ne banga yekitiya neteweyî ye. Ji bo cîbicîbûna perspektîfa konfederalîzma demokratîk ku birêz Ocalan bi sala ye diparêze, gaveke stratejîk e. Yekitiya neteweyî jî çarçoveyeke vê gavê ye lê armanca esasî, avakirina pergaleke civakî ye demokratîk e ku hemû gel wekhev, azad û bi dilxwazî bi hev re dijîn. Lewma bang ji bo hemû gelên Rojhilata Navîn e. Ev têkoşîn ne tenê ya partiyên siyasî, lîder û saziyan e. Divê tevahiya gelê Kurd tev li bibe û xwedî lê derkeve. Bersivdayina vê bangê, erkekî dîrokî ye. Ji bo nûnertiya îradeya gelê Kurd, ji bo daxwazan veguherînin destkeftiyên şênber û pêşkeşkirina jiyaneke birûmet, ji bilî vê tu rêyên me nînin. Gelê Kurd ragihand ku bi pêşengtiya Ocalan de ji aştî û çareseriya demokratîk re amade ye. Divê dewlet û saziyên cîhanê vê firsenda dîrokî jinedîtî ve neyên. Kurdên ku di Lozanê de li ser maseyê nebûn, îro ji bo diyarkirina qedera xwe li ser pêyane. Divê êdî cîhan fêm bike ku mifteya îstîqrara herêmê, bi çareseriya aştiyane û demokratîk a pirsgirêka Kurd pêkan e.” 

MA/MUJDAT CAN