MAHMÛT ALTINTAŞ / MA / ŞIRNEX
Bi “Bendava Cizîrê” ku tê plankirin wekî bendava 10'emîn a li ser Çemê Dîclê ya Şirnexê bê çêkirin re gelek cihên dîrokî wê di bin avê de bimînin. Bendava ku cara ewil di 24’ê gulana 2013’an de hat îhalekirin ji ber hin nakokiyên cuda hat betalkirin. Tê gotin ku bendava ku tê xwestin bê çêkirin piştî Bendava Ilisûyê wê bibe duyemîn bendava herî mezin. Ji bo bendava ku ji aliyê Wezareta Daristan û Çandiniyê û Midûriyeta Giştî ya Karên Avê ya Dewletê (DSÎ) ve hatibû plankirin, di 29’ê nîsana 2019'an de destûra Nirxandina Bandora li Hawirdorê (ÇED) hatibû dayîn. Bendava ku wê li jêrzemîna gundê Misirûyê ya bajarokê Qesirkê tê xwestin bê çêkirin her çiqas her sal bikeve rojevê jî ne diyar e wê kengî bê destpêkirin. Heke bendav were çêkirin zeviyên çandiniyê û xaniyên welatiyan wê di bin avê de bimînin, gelek cihên dîrokî di bin avê de bihêle, wê bibe sedema tunekirina gelek cureyên zindî jî. Herwiha Herêma Kurdistanê û Iraq jî bi temamkirina bendavê re wê bi qeyrana ava re rû bi rû bimînin.
Dîrok wê di bin avê de bimîne
Bi çêkirina bendavê re Pira Xan Mehmûd a bajaroka Qesirkê wê di bin avê de bimîne. Li gorî hin lêkolînan ev pir di dema Gutiyan de hatiyê çêkirin û xwedî dîrokeke kevnar e. Pir di sala 2011'an de ji ber lehiyê xira bûye û pişt re hatiye restorekirin.
Bajarokê Qesirkê ku jê re “Derbasoka Qiralan” tê gotin gelek cihên dîrokî di nav xwe de dihewîne. Yek jî ji van cihên dîrokî peykerê Bûk û Zava yê li ser kevirekî li ser çem hatiye çêkirin e. Li gorî hin lêkolînan di dema Gutiyan de hatiye çêkirin û lê belê li gorî hin zanyariyên din jî Siwariyên Partan çêkiriye û li gorî şeniyên bajarok jî ew peykerê Bûk û Zava ye. Her çiqas dîroka çêkirina peyker nayê zanîn jî tê texmîn kirin ku ew peyker ji 6 hezar salan kevntir e. Bi çêkirina bendavê ew peyker jî wê di bin avê de bimîne. Xelkê li bajarokê Qesirkê dijîn her sal ji tirsa “Bendav wê bê çêkirin” re rû bi rû ne anîn ziman ku bendav her sal di rojeva wan de ye lê nizanin wê kengî bê çêkirin û xwestin projeya bendavê bi temamî bê batal kirin.
Debara xelkê wê binav bibe
Ji şêniyên bajarok Abdullah Kultur got ku heke bendav bê çêkirin şeniyên bajarok jî wê ji neçariyê koçber bibin û wiha got:“Em naxwazin li vir bendav bê çêkirin. Ax, zevî û dîroka me wê di bin avê de bimîne. Ekolojiya me wê ji holê rabe. Qesrik cihekî dîrokî ye banga me ji rêxistinên ekolojîk û saziyên demokratîk ew e ku li dijî vê yekê bisekinin ku ew projê bi temamî bê betal kirin. Heke bendav bê çêkirin dê 3 tax di bin bendavê de bimînin.” Mehmet Kultur jî got:“Herkes li dijî çêkirina bendavê ye. Em debara xwe tenê bi çandinî û sewalkariyê dikin. Heke ku bendav were çêkirin tu qadeke ku em çandiniyê bikin namîne. Ekolojiya me wê hilweşe û debara me jî ji destê me bê girtin. 2 meh berê bi parêzeran re hatin û zeviyên me kontrol kirin. Lê niha kes li ser bendavê tiştek nabêje. Dibêjin wê di nava 3 salan de bê çêkirin. Em dixwazin ev proje bi temamî betal bibe. Gelek avahiyên dîrokî yên wek Pira Xan Mehmûd, Kela Mercana Reş, Peykerê Bûk û Zawa dê di bin avê de bimînin. Banga me ji her kesî re ew e ku li dijî çêkirina bendavê bisekinin.”
