- Yekîtiya Navneteweyî ya Çanda Mezopotamyayê (UMKD) ya ku li bajarê Bocholt ê Elmanyayê karan dibe serî û karên xwe didomîne, koroya zarokan a 'Koma Hêviya Rojê' heye. Kom layiqî xelata 'Entegrasyonê' ya ku her du salan carekê li bajar tê dayîn, hate dîtin.
ARAT ARARAT
Koma zarokan a Hêviya Rojê ji aliyê Selda Koldamca û Hêlîn Çelik ve tê rêvebirin. Koroya zarokan, bi stranên ku deng didin û cilên neteweyî yên ku li xwe dikin, bala bajar hemû dibe ser xwe. Malbata Selda Koldamca ya ku li Almanyayê ji dayik bûye û mezin bûye, ji navçeya Qubîn (Beşirî) ya Êlih'ê ye. Koldamca ya ku zimanê dayikê paşê hîn bûye, wekî patolog dixebite û di heman demê de di çarçoveya UMKD'ê de di çalakiyên çandî de cih digire. Koldamca ku endamê Desteya Entêgrasyonê ya bajar e jî, behsa maneya xelata ku wergirtiye kir û li ser karên xwe peyivî.
Armanc li ber asîmîlasyonê rawestandin e
Koldamca, pêvajoya damezrandina koroya zarokan bi van gotinan anî ziman; “Di sala 2016'an de em li ser zarokên me, çanda me, zimanê me û paşeroja me bûn, em çi dikarin bikin û me biryar da ku ev koro were avakirin. Her Yekşemê em li avahiya komeleyê dixebitin. Dayîkan pir eleqeyeke mezin nîşanî xebata me dan; em spasdar in. Zarokên xwe tînin vir û di nîşandana mîzansenê ya ku em amade dikin de, ew alîkariyê dikin ku em ezmûnên ku li Kurdistanê jiyane bi zarokan re parve bikin. Armanca me ewe ku em zêdetir xwe bigihîjinin malbat û zarokên wan. Ji bo rawestandina asîmîlasyonê, divê em projeyên bi vî rengî bibin serî.”
Zarok zimanê dayikê hîn dibin
Di Koma Hêviya Rojê de nêzîkî 15 zarok hene ku temenê wan di navbera 3 û 14 salan de ye. Koldamca da zanîn ku zarok hem bi zimanê dayikê stranan dibêjin hem jî fersenda fêrbûna zimanê dayikê dibînin û wiha dewam kir; “Em bi zarokan re bi Kurdî diaxivin. Em zêdetir stranên gelerî, stranên welat û şoreşê dibêjin. Stranên û cilên me yên neteweyî pir bala Elmanan û civakên din dikişînin. Gelek sazî û rêxistinên ku tên tevlî çalakiyên me dibin, me vedixwînin cihê xwe. Ev jî me şa dike.”
Saziyeke rengîn
Xelata 'Entêgrasyonê' ya ku her du salan carekê ji aliyê Desteya Entêgrasyonê ya bajêr ve tê organîzekirin. Bi giştî 5 endam hebûn ji bo xelatê werbigirin lê di dawiyê de Koma Hêviya Rojê layiqî xelat hate dîtin.Di merasîma xelatê de, li gel malbatan, nûnerê Şaredarê Bocholt û Serokê Desteya Entêgrasyonê Juan Lopez Casanava jî amade bûn. Nûnerê Şaredarê Michael Wiesmann di axaftina xwe de spasiya koroya zarokan kir û got: “UMKD saziyeke pir rengîn e. Car caran em projeyên hevpar bi hevre dibin serî. Em piştgirî didin van karan. Baş e ku saziyeke wisa heye û van karan dike.”
Xelat motivasyonê zêdetir dike
Selda Koldamca got ku dema ku wan bihîstiye ku koroya zarokan layîqê xelatê hatiye dîtin, pir şa bûne. Wê bi van gotinan hîsên wê ya wê demê îfade kir: “Ez pir şa bûm, ew hîseke pir cuda bû. Bi vê xelatê ez têgihîştim ku em hatine qebûlkirin û wekî parçeyeke vê civakê têne dîtin. Ew xelatek motîveker û pir watedar bû. Divê em li her bajarê ku gelê me lê ye, giranî bidin karên çandî. Em li dijî asîmîlasyona di bin navê entêgrasyonê de tê kirin disekinin. Hêleke me li aliyê entegrebûnê ye lê em çand û hunera xwe radibin.”
Koldamca got ku ew her tim ji bo çalakiyên çandî yên ku ji aliyê Şaredariya Bocholt ve têne organîzekirin, tene vexwandin û got; “Bi vî awayî fersend tê dayîn ku em hem çanda me hem jî zimanê me bidin nasîn. Em spasiya Şaredariyê û Desteya Entêgrasyonê dikin. Em piştgiriya rêveberiya UMKD'ê jî dikin ku ew dayikên me bi tenê nahêlin û wan jibîr nakin. Em spasiya her kesê ku piştgiriyê dide me dikin.”
