Vera tecrîdî gazîya xoverdayîşî: Her kes berpirsîyar o

Mehmet GULEŞ / MA / ŞIRNEX

Hetê Hemserekanê HDPyî yê Şirnexî ra vera tecrîdî gazîya xoverdayîşî ameye kerdene û înan va, “Heta ke tecrîd wemedarîyo, qet yew mesele safî nêbena.”

Serekê PKKyî Abdullah Ocalan, 24 serrî yo Îmrali de binê tecrîdî de yo. 30 aşmî yo ci ra xebere nîna girewtene. Hetê Hemserekanê HDPyî yê Şirnexî r ana rewşe ameye erjnayene û înan dîyar kerd ke heta ke tecrîd wemedarîyo, qet yew mesele safî nêbena.

Vera tecrîdî xoveradyîş

Hemsereka HDPyî ya Şirnexî Sabuha Akdage va, “Pêroyê ekonomîyî sebe şerî yeno xerckerdene. Na rewşe ver zî krîz çend şino giran beno. Tecrîd tena Kurdan ser de ney pêroyê Rojhelatê Mîyanênî ser de bandor keno. Seba wedartişê tecrîdî ma ganî xo berpirsîyar hîs bikerê. Ma ganî vera tecrîdî çalakîyanê pîlan bikerê û her cayê dinya de vera tecrîdî xoverdayîşê xo biramnê.”

CPT nêşkayo bêteref bimano

Hemserekê HDPyî yê Şirnexî Abdullah Gungenî bale ante mîsyonê CPTyî ser û va, “Meseleya tecrîdî de, CPT nêşkayo bêteref bimano. Senî ke hêzê mîyannetewîyî seba menfeatê xo vengê xo nêkenê, CPT zî eynî tewir têgêreno. Tecrîd o ke Birêz Ocalanî ser de yeno ramitene, qet yew hiqûqî de cayê xo çin o. 30 aşmî yo ne awiqatanê xo ne zî keyeyê xo de nêşkeno pêvînayîşan bikero.”

‘Çareserî Birêz Ocalan o’

Gungenî va, “40 serrî yo şerêk esto û şer de di hetan ra zî xeylê kesî merdê. Dewî ameyê vêşnayîş û vengkerdiş. Tirkîya de hetê sîyasî, ekonomî û komelkî ra kaos esto û sebebê ci çeresernêkerdişê meseleya Kurdan a. Heta ke tecrîd wemedarîyo, no kaos do dewam bikero. Seba çareserîye ganî tecrîd bêro wedartene û Birêz Ocalanî reyde pêvînayîşî bibê. Tecrîd ke wedarîyo do vernîya her çîyî abibo. Kesê ke vanê ma wayîrê wijdanî yê û ma haştîye wazenê ganî vera tecrîdî xoverdayîşê xo biramnê.”