‘Tena ez wazena şêrî dewa xo’

• Dayîka Nefîse vana, “Ez poşman a ke mi erdê xo teriknayo, xatirayê mi, domantîya mi uca de mendê.”

MEDÎNE MAMADOGLÛ - NÛJINHA/AMED

Nefîse Bayram Pasûrij a, 1994î de dewa înan hetê dewlete ra ameye vêşayîş. Dayîka Nefîse vana, “Ez poşman a ke mi erdê xo teriknayo, xatirayê mi, domantîya mi uca de mendê.”

Kurdistanê Başûrî de serranê 90an de tehdaya dewlete ver xeylê kesî cayê xo ra bîyê. Şarê dewanê Dîyarbekir, Mêrdîn, Hekarî û Şirnexî mecbûr mendê dewanê x ora vejîyê û şêrê bajaranê pîlan. Kesê ke dewanê xo de mendê raştê zulim û îşkenceyan ameyê. Cinîyê ke erde xo ra dûrî kewtê hema sey ewroyî dejê nê zulmî hîs kenê.

“Ma bê dûyê kilan çîyêk nêdîyêne”

Dayîka Nefîse zî nê cinîyan ra yew a. Dayika Nefîse 28 serran ra nat dewa xo ra dûrî cuwîyena. Daya Nefîse vana, “Ma keyeyanê ma ra vetê, eskeran bi heqeretan ma dewa x ora vetê. Ma berdê cayêko raşte û dormaleyê ma girewtê. Dima kewtê keyeyanê ma û înan adir na keyeyanê ma ra. Înan ma ra va heta meşte tîya biteriknê. Dewî heta serê sibayî vêşayê.”

“Ez poşman a ke ez dewa xo ra vejîyaya”

Daya Nefîse vana, “Eskeran ma ra va şêrê bajaran. Mi destê domanê xo yê çar serreyî girewt û ez xirba keyeyê xo ra vejîyaya. Dewa m ara heta Licê dewa ke înan nêvêşnaybî çin bî.”Daya Nefîse yena Dîyarbekir de bi keyeyê xo reyde ca dana xo. Dayê vana, “Ma qasê çend aşman çend keyeyî yew keye de mendê. Ma ardî û şekerî bi kîloyî eşkayêne biherînê. Qicê mi Dîyarbekir de bîyê pîl, roja ke mi bêrîya dewa xo nêkerdêne çin bî. Ez nika vana, werekna ez dewa xo ra mevejîyayêne, ez dewa xo de bimendêne.”

“Ez wazena keyeyê xo newe ra virazî û agêrî dewa xo”

Dayîka Nefîse vana, “Xeylê dewijê ma vêşayîşan ra xeylê wext dima agêrayê dewe. Înan keyeyê xo yê xirabeyî newe ra viraştê. Tena ez menda. La ez zî rojêk şina û keyeyê xo virazena. Ez wazena erdê xo de rence bikerê û cuya xo dewa xo de bivîyarnî.”